Saturday, April 1, 2017

(10) Hopes for YBS !


 Hello YBS !
Hello Yangon !!
(10) Hopes for YBS !

ကွီးဖြိုးကြောင့် စနစ်တစ်ခုတော့ပြောင်းသွားခဲ့ရပြီ ။ ထောက်ခံသူတွေရော မထောက်ခံသူတွေရော စည်စည်ကားကားနဲ့ မ.ထ.သ စနစ်ကနေ YBS ပြောင်းသွားတဲ့အထဲမှာ ကိုယ်ကိုယ်တိုင်ရော ဘယ်လို သဘောရလဲ ဘယ်လို အမြင်ရှိလဲဆိုတာ ကိုယ့်ကိုယ်ကို ပြန်မေးမိတယ် ။

ရှင်းပါတယ် ကျွန်တော့်အနေနဲ့ မ.ထ.သ ကနေ YBS စနစ်ပြောင်းလဲခြင်းအပေါ် အကြွင်းမဲ့ထောက်ခံပါတယ် သို့သော် ပြောင်းလဲသွားတဲ့စနစ်နဲ့ နည်းပညာ အားနည်းချက်တွေကိုတော့ မထောက်ခံချင်ပါဘူး ။ ရှင်းရှင်းပြောရရင် ကိုယ်ကိုယ်တိုင် လက်သန်းမှင်တို့ပြီး မဲမေးထားတဲ့အစိုးရပဲ ဒီတော့ အပြစ်တွေပြောနေမယ့်အစား ကောင်းအောင်ဘယ်လို ဆက်လုပ်ကြမလဲဆိုတဲ့ Positive thinking ဖက်ကိုသွားဖို့ ကိုယ့်ကိုယ်ကို တွန်းအားပေးနေမိတယ် ။

ဒါဆို ခင်ဗျားက ဘယ်ဟာတွေ မထောက်ခံသလဲလို့ မေးမယ်ဆိုရင်တော့

၁ ။ လောလော .. လောလောနဲ့ ပြည်သူ့ဖက်က Feedback လုံလောက်စွာမယူပဲ ရက်အနည်းငယ်နဲ့ ပြောင်းချလိုက်တဲ့ကိစ္စ

၂ ။ ဖြစ်ပေါ်လာမယ့် အခြေအနေတွေကို ဖြေရှင်းပေးမယ့် ရေတို ရေရှည် plan တွေမရှိခြင်း

၃ ။ ကားတွေကြပ်ညပ်နေယုံသာမက အချို့သော ယာဉ်နောက်လိုက်တွေ မိုက်ရိုင်းမြဲ မိုက်ရိုင်းနေဆဲအပြင် ထိရောက်စွာ အရေးမယူနိုင်ခြင်းကိစ္စ

၎ ။ ပြိုင်မောင်းလုမောင်း ကျော်ခွမောင်း မောင်းချင်သလိုမောင်း ဘယ်သူတွေဘယ်လိုတိုင်တိုင် စိတ်ကျေနပ်လောက်တဲ့ ထိရောက်စွာ အပြစ်မပေးနိုင်ခြင်းကိစ္စ

၅ ။ Traffic အခြေအနေ ယာဉ်လမ်းကြောင်း ခရီးသည်ဦးရေ Crowded Timing စတဲ့ အချက်အလက်တွေကို လုံလောက်စွာ Survey မယူနိုင်ခြင်းကိစ္စ

ရေးရမယ်ဆိုရင်အများကြီးပဲ မရေးတော့ဘူး ဒီစာရေးတဲ့အဓိကအချက်က YBS စနစ်ကို ကိုယ်မြင်ချင်နေတဲ့ပုံစံလေးမြင်ရဖို့အတွက် နမူနာ ဘာတွေဖြည့်စွက်သင့်တယ်ဆိုတဲ့ အကြံပေးစကားအချို့ကိုချရေးချင်ယုံသက်သက်ပါပဲ ။ ကဲ စလိုက်ကြပါစို့ . ။

ပုံ ( ၁ ) ရန်ကုန်မြို့ရဲ့ လမ်းမတွေပေါ်က စည်းအမှတ်အသား (Marks ) တွေကို ထင်ရှားပြတ်သားစွာ တစ်မြို့လုံး ပြန်လုပ်စေချင်ပါတယ် ။ အချို့သော လမ်းတွေမှာ အဟောင်းတွေပေါ် အသစ်တွေ ထပ်ပြီး အမှတ်အသားလုပ် တော့ ၂ ထပ် ၃ ထပ်နဲ့ တော်တော်ကြည့်ရဆိုးတဲ့အပြင် ကားမောင်းနေကျ လူမဟုတ်ရင် ဒီအမှတ်အသားတွေက တော်တော် confuse ဖြစ်စေပါတယ် ။

ပုံ (၂ ) လမ်းအလယ်မှာ သေမင်းတမန် ဘလောက်တုံးတွေအစား ပုံထဲကလို Boundry လေးတွေထားစေချင်ပါတယ် ဘာကြောင့် သေမင်းတမန်ဘလောက်တုံးလို့သုံးရသလဲဆိုရင်တော့ အဲ့ဒီဘလောက်တုံးတွေကြောင့် ကားမောင်းသူတွေ ဘယ်လောက်ဒုက္ခရောက်ရသလဲဆိုတာ မောင်းဖူးသူတိုင်းသိကြမှာပါ ။ လမ်းအလယ်ကျွန်းကို space သိပ်မပေးပဲ လုပ်မယ်ဆိုရင် ဖြစ်နိုင်မယ်လို့ထင်ပါတယ် ။

ပုံ (၃) MRT လို့ခေါ်တဲ့ Mass Rapid Transit မလုပ်နိုင်သေးခင် အလွန်စနစ်ကျတဲ့ Bus Rapid Transit - BRT ကို အရင်ဆုံးအပြီးအပြတ်အကောင်အထည်ဖော်စေချင်ပါတယ် ။ ဒီစနစ်ကို အကောင်အထည်ဖော်ဖို့ တော်တော် အခက်အခဲ ကြုံရမှာဖြစ်ပေမယ့် ရေရှည် plan အနေနဲ့ကြည့်ရင် စတင်အကောင်အထည်ဖော်သင့်နေပါပြီ ။ ပုံမှာ ပြထားတဲ့အတိုင်း Bus route ကို အိမ်စီးကားနဲ့ Taxi တွေဝင်ရောက်နှောက်ယှက်လို့မရတဲ့စနစ်လို့ဆိုကြပါစို့ ။ BRT ကို အကောင်အထည်ဖော်မယ်ဆိုရင် YBS Bus Route တွေအားလုံးကို ပြန်လမ်းကြောင်းဆွဲပြုပြင်ရမှာဖြစ်တဲ့အတွက် အပိုင်းလိုက် Region အလိုက် အကောင်အထည်ဖော်သွားရင်ဖြစ်နိုင်မယ်လို့ထင်ပါတယ် ။ ( မဖြစ်နိုင်ဘူး ခက်ပါတယ်ဆိုပြီး ဘာမှမလုပ်ပဲ ဒီအတိုင်းဆက်သွားနေရင် နောင် ဘယ် နှစ်နှစ်ဖြစ်ဖြစ် စလုံးကို မှီမယ်မထင် ) မြို့တစ်မြို့ရဲ့အဓိက ပင်မ အင်္ဂါရပ်က မြို့တော်ဆက်သွယ်သွားလာရေးကွန်ယက်တွေ အဆင့်မြင့်မားနေဖို့အဓိကပါပဲ ။ ဒီအတွက် Budget တော့လိုပါလိမ့်မယ် ။

ပုံ (၄ )Middle sided BRT အကောင်အထည်ဖော်ဖို့ စိတ်ကူးမရှိဘူး လက်ရှိ အခြေအနေကိုပဲ ဘယ်လိုကောင်းအောင်လုပ်မလဲလို့ စဉ်းစားနေတယ်ဆိုရင်တော့ BRT စနစ်ကိုပဲ လမ်းအလယ် Bus သွားတဲ့စနစ်မဟုတ်ပဲ ပုံမှာပြထားတဲ့အတိုင်း Bus Route ကို ညာအစွန် သတ်မှတ်ပြီးလုပ်ရင်ဖြစ်နိုင်ပါတယ် ။ ဒါပေမယ့် လက်ရှိ ရန်ကုန်မှာလည်း ဒီလို လုပ်ထားပေမယ့် Bus ၀င်ရမယ့် လမ်းပေါ်မှာ အိမ်စီးကားတွေ Taxi တွေ ရှိနေသလို အိမ်စီးကားနဲ့ Taxi ရှိရမယ့် လမ်းကြောမှာ Bus တွေ သွားနေကြတာ အများကြီးပါပဲ ။ ဒါလေးကို အရင်ဆုံးစည်းစနစ်တကျဖြစ်အောင်လုပ်ပြီး ထိရောက်တဲ့ ထိမ်းချုပ်မှုစနစ်နဲ့ ဖြေရှင်းနိုင်မယ်ဆိုရင် Traffic ပြဿနာကိုပါ တစ်ဖက်တစ်လမ်းက ဖြေရှင်းပြီးသားဖြစ်နိုင်မှာပါ ။

ပုံ (၅) Bus တွေ ရပ်ပြီး ခရီးသည်တင်မဲ့ Bus Stop တွေမှာ ပုံမှာ ပြထားတဲ့အတိုင်း Curving တွေကို ခပ်ကြီးကြီးလုပ်ထားစေချင်ပါတယ် ။ ရန်ကုန်က တချို့ မှတ်တိုင်တွေမှာ Curving လုပ်ထားပေမယ့် အထဲဝင်ရပ်ဖို့အတွက် စည်းကမ်းကျတဲ့ယာဉ်မောင်းတွေရှိဖို့လိုပါဦးမယ် ။ ဒါက ဘာနဲ့သွားချိတ်ဆက်နေသလဲဆိုရင် Card စနစ်မပြောင်းနိုင်သေးတာနဲ့ ချိတ်ဆက်ပါတယ် ။ ဒီစနစ်ကို ပြောင်းလိုက်တာနဲ့ ၁ - ယာဉ်တွေလုမောင်းစရာ မလိုတော့ဘူး ၂ - ယာဉ်အကူတွေ မလိုတော့ဘူး only service ပဲပေးရတော့မယ် ၃ - ရပ် တင် ချ ထွက် စနစ်ကို လက်ငင်းအကောင်အထည်ဖော်လို့ရသွားပါပြီ သေချာပါတယ် ဒီစနစ်ဖြစ်သွားတာနဲ့အမျှ လုမောင်းတာ မရှိတော့သလို ယာဉ် ၂ ထပ် ၃ ထပ်တွေဖြစ်စရာလည်းမလိုတော့ပါဘူး ။

ပုံ (၆) ကားမှတ်တိုင်တိုင်းမှာ ခရီးသည်တွေ အထိုက်အလျောက် ကင်းစေဖို့အတွက် Bus ၀င်ရပ်မဲ့ နေရာ နဲ့ ခရီးသည် ရှိနေမယ့် Platform နေရာကြားမှာ ပုံမှာပြထားတဲ့အတိုင်း အုတ် တိုင် ( သို့) steel တိုင်လေးတွေထားစေချင်ပါတယ် ။ Safety အတွက်အသုံးဝင်သလို အထိုအလျောက် ယာဉ်အန္တရာယ်လည်းကင်းစေမှာဖြစ်ပါတယ် ။

ပုံ (၇) မြင်ချင်တာကတော့ ပုံမှာပြထားတဲ့အတိုင်း Bus မှတ်တိုင်တိုင်းမှာ LED Board လေးတွေနဲ့ ဘယ်နှစ်မိနစ် ဘယ် ကားနံပါတ်လာမယ် ဘယ်ကိုရောက်မယ် စသဖြင့် ကြော်ငြာပေးနေတဲ့ Information LED Board လေးတွေပါ ဒါကလည်းနောင်တချိန်ဖြစ်ကိုဖြစ်လာမှာပါ အခု Budget ကြောင့် ဒါမျိုးမလုပ်နိုင်သေးဘူး Network မရှိသေးလို့ GPS တွေအားလုံးမတပ်ရသေးလို့ control center ကနေမချုပ်ကိုင်နိုင်သေးလို့ လတ်တလောမလုပ်နိုင်သေးဘူးဆိုရင်တောင် ရှိတဲ့ကားမှတ်တိုင်အားလုံးကို အဆင့်မြှင့်ဖို့အကြံပြုလိုပါတယ် ။ ကားမှတ်တိုင်တွေက နိုင်ငံတကာအဆင့်မှီ ပျံထွက်နေရမယ်မဆိုလိုပါဘူး ။ ဒါပေမယ့် သက်တောင့်သက်သာ ထိုင်စောင့်နိုင်ရမယ် လိုအပ်တဲ့ လမ်းညွှန်ကို လမ်းတကမ်းမှာ ဖတ်နိုင်ရမယ် လမ်းညွှန်ဆိုင်းဘုတ်မှာ ရေးထားတာတွေက YBS Bus Route အားလုံးပါဖို့ထက် ဒီမှတ်တိုင်ကို ကားဘယ်နံပါတ်တွေရောက်မယ် ဘယ်ကိုရောက်မယ်ဆိုတာ မျိုး ကို ရှင်းလင်းတိုတုတ်ရေးတာမျိုးလေးဖြစ်စေချင်ပါတယ် ။ ၀ုန်းမယ့်ဝုန်း LED Board တွေနဲ့ ပုံမှာ ပြသလို လုပ်စေချင်တာ ဒါပေမယ့် ငွေရေးကြေးရေးအခြေအနေကလည်းရှိသေးတယ်မဟုတ်လား ဒါ့အပြင် မီးက မှန်နေဖို့လည်းလိုသေးတယ် ။

ပုံ (၈ ) လူအရမ်းများပြီး ကျယ်ပြန့်လွန်းတဲ့ မှတ်တိုင်ကြီးတွေ Transit point လိုဖြစ်နေတဲ့ မှတ်တိုင်ကြီးတွေမှာ Queue စနစ်ကိုသုံးစေချင်ပါတယ် ။ Queue ကို ကားမှတ်တိုင်မှာ စဉ်းစားမယ်ဆိုရင် ခရီးသည်လည်းသိပ်ပုံမနေဖို့ဆိုရင် ဥပမာ ယာဉ်လမ်းကြောင်းအရောင်နဲ့ လမ်းကြောင်းလုပ်ပေးထားရင်ဖြစ်နိုင်မယ်ထင်ပါတယ် ။ Queue စီဖို့ကတော့ လတ်တလော steel ကွေးတွေနဲ့ မလုပ်နိုင်သေးရင် လေဆိပ်တွေမှာ ထားတဲ့ ပုံစံမျိုးဆိုဖြစ်နိုင်ပါတယ် ပုံအသေးမှာပြထားပါတယ် ။

ပုံ (၉) ရှေ့ပေါက်က၀င် နောက်ပေါက်က ဆင်း စနစ်ကိုလည်း Bus အားလုံးမှာ ထိရောက်စွာ အကောင်အထည်ဖော်စေချင်ပါပြီ ။ လုတက်နေတာမျိုးတွေက မဖြစ်သင့်တော့တဲ့အပြင် မြို့တစ်မြို့ရဲ့အလှကို ပျက်စီးစေပါတယ် ။ ကားတွေကိုလည်း မြန်မြန် Model မြှင့်သင့်နေပါပြီ  ။ ဒူးတောင်ကွေးလို့မရတဲ့ ထိုင်ခုံတွေရယ် ကိုယ်နင်းထားတဲ့ကြမ်းခင်းကျွံကျမှာ စိုးတဲ့ခံစားချက်ရယ် ပြတင်းပေါက်ကနေ လွင့်ထွက်မှာစိုးလို့ အတင်းတွယ်ကပ်ထားရတာတွေရယ်ကားပေါ်မှာ နှမချင်းမစာနာ တတ်တဲ့ကောင်တွေရဲ့ဒါဏ်တွေကို လွတ်ကင်းဖို့ရာ လူချောင်ချောင်ချိချိစီးနိုင်ဖို့ BRT လိုကားမျိုးတွေကို အဆင့်မြှင့်စေလိုပါတယ် ။ အသစ်မှာယူထားတယ်ဆိုတဲ့ ဘတ်စ်ကားသစ်ကြီးတွေရယ် CCTV တွေ Wifi တွေ ဆင်ထားတဲ့ ကားကြီးတွေရယ်မြင်ချင်လှပါပြီ ။

ပုံ (၁၀) သတင်းတစ်ခုမှာ တော့ ရန်ကုန်တိုင်းဝန်ကြီးချုပ်က YPS လို့ခေါ်တဲ့ Yangon Payment System ကို Apirl 1 ရက်နေ့မှာ စတင်အကောင်အထည်ဖော်မယ်ဆိုပြီးဖတ်လိုက်ရပါတယ် ။ Warmly welcome ပါ ကွီးဖြိုး ဒီစနစ်နဲ့အတူ အားသာချက်အားနည်းချက်တွေအများကြီးပေါ်လာဦးမှာပါ ။ အားသာချက်တွေကတော့ ငွေအကြွေမကိုင်ရတော့ဘူး စနစ်ကျလာမယ် ယာဉ်တွေလုမမောင်းတော့ဘူး အချို့သောစပါယ်ရာတွေရဲ့ မိုက်ရိုင်းတာ မခံရတော့ဘူး အခက်အခဲတွေကတော့ အသုံးပြုပုံပြုနည်း ၊ ငွေဖြည့်နည်း ၊ ကဒ်ကို ယာဉ်ပေါ်တက်တိုင်းမှာ ငွေပေးချေဖို့အတွက် စက်မှာ သွားရိုက်တတ်စေဖို့ စတာတွေကို အချိန်ယူ စနစ်တကျ ပြင်ဆင်ဖို့လိုပါလိမ့်မယ် ။ ဒီနေ့ April 1 ရက်နေ့ပါ ။  ဒီစာရေးတဲ့အချိန်အထိ YPS နဲ့ ပတ်သတ်လို့ဘာမှ ထပ်မကြားသေးပါဘူး ။ တကယ်သာ အကောင်အထည်ဖော်နိုင်မယ်ဆိုရင်အခုချိန်လောက်ဆို လက်ကမ်းစာစောင်တွေ ကဒ်တွေ ဘယ်မှာ ၀ယ်လို့ရမယ် ဘယ်လိုသုံးရမယ် ဘယ်မှာ ငွေဖြည့်လို့ရမယ် စတဲ့ သတင်းတွေ ပလူပျံနေမှာပါ ။ အခုထိတော့ တိတ်ဆိတ်ငြိမ်သက်နေတုန်းပါပဲ ။

ကွီးဖြိုးပြောသွားတဲ့စကားတစ်ခွန်းမှာ ကျနော်တို့နိုင်ငံက နောက်ဆုံးမှ YBS ကို အကောင်အထည်ဖော်တာဖြစ်တဲ့အတွက် တခြားနိုင်ငံတွေထက်စာရင်နောက်ဆုံးပေါ်နည်းပညာတွေကို သုံးစွဲခွင့်ရမှာပါတဲ့ ။ ဟုတ်ကဲ့ အမေစု ရွေးချယ်ပေးထားတဲ့ ၀န်ကြီးမို့ ကိုယ်တွေ အရွေးမမှားခဲ့ဘူးလို့ဆက်လက်ယုံကြည်နေချင်ပါသေးတယ် ။ ဒီအတွက် Survey လေးများများလုပ်ပေးပါ ။ Action လေး ထိထိရောက်ရောက်ယူပေးပါ ။ Plan တွေ ကို လက်တွေ့အကောင်အထည်မဖော်ခင်မှာ ပြည်သူလူထုကို ကြော်ငြာအသိပေးပါလို့ပြောရင်း ဆိုးသွမ်းမိုက်ရိုင်းအချို့သော ယာဉ်နောက်လိုက်များအား ထိရောက်ပြင်းထန်စွာ အရေးယူဖို့ တိုက်တွန်းရင်း YBS စနစ်ကြီးရဲ့အောင်မြင်သောနေ့ရက်ကို စောင့်မျှော်လျှက်ရှိကြောင်းတင်ပြလိုက်ပါတယ် ။


သက်တန့်ချို
1.4.2017

No comments:

Post a Comment

ဒါလေးတွေရောဖတ်ပြီးပြီလား

Related Posts with Thumbnails