Lianhua Qingwen (LH) capsule နဲ့ COVID-19 အကြောင်း

Lianhua Qingwen (LH) capsule နဲ့ COVID-19 အကြောင်း

LH လို့အတိုကောက်ခေါ်တဲ့ Lianhua Qingwen ဆေးတောင့်တွေဟာ တရုတ်ပြည်ရဲ့ Herbal product ဖြစ်ပြီး ဘေဂျင်းရဲ့ ကိုရိုနာကို တရုတ်တိုင်းရင်းဆေးအရ ကာကွယ်ထိမ်းချုပ်ရေး program မှာ ပါဝင်ခဲ့ပါတယ် ။ ဆိုလိုတာက ဒီဆေးတောင့်ကို လူကြီးလူနာတွေကို ကုသမှုပေးတဲ့အခါမှာ အသုံးပြုခဲ့ကြပြီး Under medical observation ( ဆေးပညာအရလေ့လာစောင့်ကြည့်အသုံးပြုဆဲ ) ဖြစ်တယ်လို့ဆိုတယ် ။

LH ဆေးတောင့်က အခုမှပေါ်လာတာတော့မဟုတ်ဘူး သူ့မှာ 13 herbs ပါတယ် lonicera japonica, forsythia suspense နဲ့ rhodiola rosea လိုမျိုးအပင်တွေပါ ။ ၂၀၀၃ ခုနှစ်တုန်းက တရုတ်ပြည်မှာ SARS Epidemic ဖြစ်တုန်းကထဲက LH က စျေးကွက်ထဲရောက်ခဲ့တာပါ ။

ဖိလစ်ပိုင်နိုင်ငံမှာတော့ LH ဆေးတောင့်ကို တရုတ်တိုင်းရင်းဆေးအဖြစ် ခွင့်ပြုတယ် ဒါပေမယ့် COVID-19 ကုသမှုအတွက်တော့ မဟုတ်ဘူးလို့ အတိအကျဆိုထားပါတယ် ။

ဖိလစ်ပိုင် FDAရဲ့အဆိုအရဆိုရင် LH ဆေးတောင့်ကို ရိုးရာတိုင်းရေးအဖြစ် အဆုတ်ကို အပူ အဆိပ်များဝင်ရောက်ခြင်းဖယ်ထုတ်ရန်နဲ့အဖျား ၊ အအေးမိ ၊ ကြွက်သားညောင်းညာ ၊ နှာမွှန်နှာရည်ယိုခြင်းအတွက်အသုံးပြုနိုင်တယ်လို့ဆိုတယ် " but not for COVID-19 treatment " ပါတဲ့ ။

June လ ၁ ရက်နေ့က nutraingredients-asia မှာ တင်ထားတဲ့ Article ကိုကြည့်မယ်ဆိုရင်
" COVID-19: TCM Lianhua Qingwen speeds up recovery but no effect in preventing conversion to severe cases – two-week RCT "

TCM Lianhua Qingwen ဆေးတောင့်က COVID19 လူနာတွေကို ပြန်လည် recovery ရစေမှုမြန်စေတယ်ဒါပေမယ့်ရောဂါပိုမပြင်းထန်လာအောင် တားဆီးတဲ့နေရာမှာတော့ no effect လို့ဆိုပါတယ် ဒါက ၂ ပတ်ကြာစမ်းသပ်ထားတဲ့ Clinical trial မှာ ဆိုထားတာပါ ။ ဆေးသောက်သူတွေရဲ့ ၂၂.၅% မှာ မူမမှန်တဲ့အသည်းလုပ်ဆောင်ချက်တွေဖြစ်ပေါ်လာတယ် Alanine Aminotransferase လို့ခေါ်တဲ့ အသည်းအင်ဇိုင်းမြင့်တက်လာတယ်လို့ဆိုတယ် ။

လက်ရှိကမ္ဘာပေါ်မှာ COVID-19 အတွက် Vaccine အတိအကျမပေါ်သေးပါဘူး ။ စမ်းသပ်ဆဲနောက်ဆုံးအဆင့်တွေနဲ့လေ့လာမှု တွေအထပ်ထပ်လုပ်နေတုန်းပါပဲ ။ မြန်မာနိုင်ငံရဲ့ FDA ကတော့ အွန်လိုင်းမှာ   ရောင်းချနေတဲ့  ကိုဗစ်-၁၉ ကာကွယ်ဖို့အတွက်ဆိုတဲ့   တရုတ်နိုင်ငံထုတ် တိုင်းရင်းဆေးဟာ တရားဝင်မှတ်ပုံတင်ထားခြင်း မရှိတာကြောင့် ပြည်သူတွေအနေနဲ့ ဝယ်ယူ သုံးစွဲတာ မလုပ်ဆောင်ဖို့ ပြောကြားထားတယ်ဆိုတာ သိရပါတယ် ။

FDA က တားနေတာကရှင်းပါတယ် တရုတ်တိုင်းရင်းဆေးအစစ် Lianhua Qingwen အစစ်ဆိုရင်  ဆိုးဆိုးရွားရွားပြဿနာမရှိနိုင်ပေမယ့် အတုတွေသာဖြစ်ခဲ့ရင် ဘယ်လိုလုပ်မှာလဲ အခုခေတ်ကြီးမှာ ဆေးဝါးအတုတွေအများအပြားရှိနေတဲ့အချိန် အွန်လိုင်းကနေ ရောင်းနေတာတွေက အစစ်မဟုတ်ခဲ့ရင် ဘယ်သူတာဝန်ယူမှာလဲ ဆိုတာ မေးခွန်းထုတ်ရမှာပါ ။ FDA ဟာ သူ့အလုပ်သူလုပ်တာမို့မှန်ပါတယ် ။ မြန်မာနိုင်ငံကိုသွင်းဖို့ဆိုရင်  FDA စစ်ဆေးမှုခံယူရမှာဖြစ်ပြီး  အဆင့်အဆင့်တာဝန်ရှိသူတွေ စစ်ဆေးခွင့်ပြုချက်ယူပြီးမှ  သုံးစွဲခွင့်ရမှာဖြစ်ပါတယ် ။

ပြောချင်တာကအခုမှ စမှာပါ .. LH ဆေးတောင့်ကို တော်တော်များများလိုက်ဖတ်ကြည့်ရသလောက်အခုမှ ထပေါ်တဲ့ဆေးတော့မဟုတ်ပါဘူး ။ တရုတ်တိုင်းရင်းဆေး Cateogry မှာ အဆုတ်အပူနာ အ ဖျားကျ အသက်ရှုလမ်းကြောင်းရောဂါများအတွက်သုံးနေတာတော့ကြာပါပြီ ။ တရုတ်ပြည်မှာ သုံးတာတော့ သူ့ပြည်သူပြည်သားတွေ အစစ်သုံးရင် သုံးရမှာပေါ့ အဲ .. အမျိုးမျိုးသောလမ်းကြောင်းတွေနဲ့တခြားနိုင်ငံတွေကိုရောက်လာတဲ့အခါမှာ ဒီဆေးဟာ အစစ်ဖြစ်ပါတယ် ဘေးအန္တရာယ်ကင်းပါတယ်လို့ အာမခံဖို့ကျတော့ခက်သွားပါပြီ ။ ဘယ်သူ အာမခံမှာလဲ ။ ဒီအတိုင်းပဲ ဟို သတင်းဒီသတင်းဖတ် ဟိုလူဒီလူပြောတာ ကြားပြီး မှာသောက်ကြတာများပါတယ် ။

ဒီဆေးဟာ တကယ်ပဲ Speedy recovery ရစေတယ် ရောဂါဖြစ်ပွားချိန်တိုစေတယ် ဆိုရင် တစ်ကမ္ဘာလုံးလည်း သုံးလို့ရအောင် ဒီထက်ပိုတဲ့ လေ့လာမှုတွေ ပြုလုပ်သင့်ပါတယ် ။ Evidence based medicine ဆိုတဲ့အတိုင်းခိုင်မာတဲ့သက်သေ တွေသာ ရှိခဲ့ရင် နိုင်ငံတိုင်းရဲ့ FDA တွေကလည်းခွင့်ပြုမှာ မလွဲပါဘူး ။ လိုက်ဖတ်ကြည့်ရသလောက်သူ့ရဲ့အဓိကအချက်တွေက အဖျားကျတာမြန်တယ် မောပန်းနွမ်းနယ်တာသက်သာပြီးချောင်းဆိုးသက်သာစေတဲ့ တိုင်းရင်းဆေးတစ်မျိုးပါ COVID မှာ အသုံးတည့်မတည့်ဆိုတာကတော့ နောက်ထပ်လေ့လာမှုတွေစမ်းသပ်မှုတွေလိုပါဦးမယ် ။

နောက်ဆုံးအနေနဲ့ဖိလစ်ပိုင်က Dr.Tan-Gatue နဲ့အမေးအဖြေတွေကလည်းစိတ်ဝင်စားဖို့ကောင်းပါတယ် ။ အစအဆုံးတော့ ဘာသာပြန်မနေတော့ပါဘူး အချို့သော အမေးအဖြေလေးတွေပဲဖတ်ကြည့်ပါ

မေး - တရုတ်တိုင်းရင်းဆေးတိုင်းမှာ တိုင်းရင်းဆေး ဖော်မြူလာအတိုင်းထုတ်ရတာလား
ဖြေ -  အဲ့လိုမဟုတ်ပါဘူး တရုတ်တိုင်းရင်းဆေးဆိုင်းဟာ TCM စည်းမျဉ်းကိုလိုက်နာရပါတယ် ဒါပေမယ့် ပါဝင်ပစ္စည်းတိုင်းကတရုတ်ပြည်ကထွက်တာမဟုတ်ပါဘူး

မေး - Lianhua Qingwen အကြောင်းမေးပါမယ် သူ့ကို ဘယ်လိုလုပ်ထားတာလဲ
ဖြေ - အတိအကျတော့မပြောနိုင်ပါဘူး ပုံမှန်အတိုင်းပဲ အရွက်တွေ ထဲကနေ လိုချင်တဲ့ဓါတ်တွေကို အကြိမ်ကြိမ်ထုတ်ယူတယ် ပြီးတော့ပေါင်ဒါအဖြစ် ပြောင်းတယ်ပြီးရင်ဆေးတောင့်ပုံစံလုပ်တယ်

မေး - ဘာတွေနဲ့ထုတ်လုပ်တာလဲဗျ
ဖြေ - LIanhua Qingwen ကို Japanese honeysuckle flower, weeping forsythia, ephedra စတဲ့ herbs တွေကနေထုတ်ထားတာပါ

မေး - သူက ဘာအတွက်ကောင်းတာလဲ
ဖြေ - အဓိကတော့ Toxic lung heat ကိုသက်သာစေတာပေါ့ Toxic ဆိုတာကအဆုတ်မှာပြည်တည်သလိုမျိုးအဆိပ်တွေဖြစ်တာ Lung head ကတော့အဆုတ်အပူချိန်တက်တာ ဒီလိုဖြစ်လာရင်အသက်ရှုခက်မယ် ရောင်လာမယ် ဒါကိုလျော့ကျစေတာလို့ဆိုပါတယ်

မေး - ဆရာဝန်ညွှန်ကြားချက်လိုလား
ဖြေ - ဖိလစ်ပိုင်မှာတော့ TCM Concepts တွေကို သိပ်မရင်းနှီးသေးဘူးဗျ ဒီတော့ ဆရာဝန်ညွှန်ကြားချက်နဲ့မှသောက်တာ ပိုစိတ်ချရပါမယ်

မေး - အန္တရာယ်ကင်းရဲ့လား
ဖြေ - ယေဘူယျကြည့်မယ်ဆိုရင်တော့ safe ဖြစ်တယ်ပြောလို့ရပေမယ့် တစ်ခုရှိတာက Ephedra herb ကနေ ထုတ်ယူထားတဲ့ ephedrine ပေါ့လေ ဒီကောင်က ဖိလစ်ပိုင်မှာဆိုရင် အန္တရာယ်ရှိဆေးဝါးစားရင်းထဲပါတယ်ဗျ ဒါပေမယ့် တရုတ်တိုင်းရင်းဆေးသဘောက ingredient တစ်ခုထဲကိုမကြည့်ရဘူး အစအဆုံးကြည့်ရတာမျိုးဆိုတော့လည်းပြောရမှာခက်ပါတယ်

ဖိလစ်ပိုင်က ဒီဆေးက FDA က COVID ကုသဖို့မဟုတ်ပေမယ့် တိုင်းရင်းဆေးအဖြစ် အဆုတ်ရောဂါကုသဖို့ခွင့်ပြုချက်ပေးခဲ့တာကြောင့် တရားမဝင်တော့မဟုတ်တော့ပါဘူး ။ ဒီဆေးကို Philippines, Brazil, Romania and Mozambique,စတဲ့နိုင်ငံတွေမှာတော့ စသုံးနေကြပြီး under registration ကတော့နိုင်ငံ ၃၀ လောက်ရှိတယ်လို့ ဒီဆေးကိုထုတ်တဲ့ Yiling Pharmaceuticals ကဆိုပါတယ် ။

မြန်မာပြည်မှာလည်း FDA က သုံးခွင့်ပြုမှ သုံးတာ စိတ်ချရပါတယ် ။ ဆေးကုမ္မဏီတွေ ဆေးဝါးတင်သွင်းသူတွေက တဆင့် သွင်းပေးဖို့ လိုသလို FDA စစ်ဆေးမှုခံယူဖို့ ခွင့်ပြုချက်ရယူမှ သာ စိတ်ချရမှာပါ ။
အွန်လိုင်းမှာ ဆေးဝါးအတုအစစ်ဘယ်လိုခွဲမှာလဲ တရုတ်ပြည်မှာတော့အစစ် ဒီကိုရောက်လာတာတွေ တရားမဝင် အွန်လိုင်းမှာရောင်းနေတာတွေက အတုတွေဖြစ်နေမယ်ဆိုရင် ဘေးထွက်ဆိုးကျိုးများတဲ့ အခြား ဆေးအတုတွေဖြစ်နေရင်တော့  သိပ်အန္တရာယ်များလွန်းပါတယ် ။

ဒါဟာ Lianhua Qingwen က အစွမ်းရှိတယ်မရှိဘူးဆိုတဲ့ ကိစ္စကိုပြောနေတာမဟုတ်ပါဘူး ။ ဆေးအစစ်လား အတုလားဆိုတာ ခွဲခြားမသိနိုင်လို့ပြောနေတာဖြစ်ကြောင်း သတိပြုစေချင်ပါတယ် ။

ကိုးကား
https://www.globaltimes.cn/content/1191897.shtml
https://www.cnn.ph/news/2020/8/12/Philippines-FDA-approves-Chinese-drug-Lianhua-Qingwen-.html
https://www.nutraingredients-asia.com/Article/2020/06/01/COVID-19-TCM-Lianhua-Qingwen-speeds-up-recovery-but-no-effect-in-preventing-conversion-to-severe-cases-two-week-RCT
http://burmese.dvb.no/archives/416288?fbclid=IwAR3A6qJcIZJq_zk1AJhEPNtheHWxSvl0lYhYK7ztzuDz2qwtsjZKwKzq2-Y
https://www.onenews.ph/us-health-agency-says-traditional-chinese-medicine-can-help-covid-19-patients-recover-faster
https://www.chinoy.tv/a-medical-doctor-answers-our-most-curious-lianhua-qingwen-questions/?fbclid=IwAR2BqrlFmp8sHwD4jpNlvWqAYjhcYo49e7BAjLUmvYZxGhL7MebZQCU1N7Y

Semi-Lock Down ၂ ပတ်နဲ့ ကိုယ့်တစ်ယောက်တည်းအမြင်သုံးသပ်ချက်

 

 

Semi-Lock Down ၂ ပတ်နဲ့ ကိုယ့်တစ်ယောက်တည်းအမြင်သုံးသပ်ချက်

လက်ရှိ တစ်ရက် တစ်ရက်ထောင်ချီတဲ့ + တွေ တိုးလာနေပြီး Death Rate တွေ တက်တက်နေတာဟာ
ဘယ်လိုပဲ ( ရသေ့စိတ်ဖြေသဘောနဲ့ အရေအတွက်ကျလာမှာပါ နောက် ၂ ပတ်နေရင်သိသာလာမှာပါ ပြောပြော )
စိုးရိမ်ရတဲ့အနေအထားပါပဲ

Stay Home ကြေငြာခဲ့တာလည်းတော်တော်ကြာပါပြီ ထပ်တိုး Semi-Lock down ဆန်ဆန် WFH တွေလုပ်ခိုင်း
Esssentail Business တွေ ပဲလမ်းပေါ်ထွက်ခိုင်းပြီး စက်ရုံအလုပ်ရုံတွေပိတ်ခိုင်းခဲ့တဲ့ ပထမဆုံးရက်က စက်တင်ဘာလ ၂၁ ရက်နေ့ဆိုတော့
အခု အောက်တို ဘာ ၅ ရက်နေ့ စုစုပေါင်း ၁၅ ရက်တိတိရှိပါပြီ ပြောရမယ်ဆိုရင် Semik-lock down ၂ ပတ် ကျော်ပေါ့

တကယ်ပဲ ပိုးကူးစက်မှုကျသွားပြီလား ဆိုရင် No လို့ပဲဖြေရပါဦးမယ် ပထမအကြိမ်ထဲက Stay home နေတဲ့တစ်ပိုင်တစ်နိုင်လုပ်ငန်းတွေနဲ့
Essential business categories တွေထဲမပါလို့ လုပ်ငန်းတွေရပ်ပြီး stay home လိုက်ကြတဲ့သူတွေအနေနဲ့ ဘယ်လောက်ထိ တောင့်ခံနိုင်မယ်ထင်လို့လဲ

ကိုယ်ကတော့သိပ်မထင်ပါဘူး လူတိုင်းမှာ တောင့်ခံထားနိုင်တဲ့ အတိုင်းအတာ ဆိုတာရှိပါတယ် ရှိစုမဲ့စု စုထားတဲ့ငွေလေးကုန်သွားရင်
စားဝတ်နေရေးအတွက် လမ်းပေါ်ထွက်ဖို့ပြန်စဉ်းစားကြမယ့်သူတွေအများကြီးရှိနေပါလိမ့်မယ် ထားပါတော့ အခု ရေးချင်တာက
အားမလိုအားမရဖြစ်နေရတဲ့အပိုင်းတွေပါ

၁ ။ လမ်းပေါ်ကို အနီတွေထွက်လိုက် အစိမ်းတွေထွက်လိုက်နဲ့ အုပ်လိုက်ကြီးတွေကို မဲဆွယ်နေတာကို ဘာကြောင့် တားဆီးမှု ပိတ်ပင်မှု အရေးယူမှု တစုံတရာမရှိတာပါလဲ
ဒီလို လမ်းပေါ် တက်ပြီး မဲဆွယ်နေတာ ( ဘယ်အဖွဲ့ဖြစ်ဖြစ် ) အမှန်တကယ် Stay home နေသူတွေကို လာပြောင်ပြနေသလိုခံစားရပါတယ် ။

၂ ။ ရခိုင်မှာ Outbreak စဖြစ်ကထဲက ရန်ကုန်ကို ပိတ်ဖို့ နှောင်းနှေးခဲ့တယ် သတင်းစာထဲ လေယာဉ်နဲ့ဝင်ခဲ့ကြသူတွေကို သတင်းပို့ဖို့ ထည့်ကြေငြာတယ် ဒါပေမယ့် လူ ၂၀၀၀ ကျော် သတင်းပို့ရန်ပျက်ကွက်ဆိုတာပဲသိရတယ် နောက်ဆက်တွဲ ဘယ်လောက်သွားသလဲမသိ ဘယ်လောက်ပျံ့သွားသလဲမသိခဲ့ရပါဘူး ။

၃ ။ Essential bussiness တွေအပြင်ထွက်အလုပ်လုပ်ပါ ကျန်တဲ့ အလုပ်တွေက WFH လုပ်လို့ရရင်လုပ် လုပ်လို့မရရင် ပိတ်ဆိုတာမျိုးကြေငြာခဲ့ပြီးမှ အုပ်စုလိုက်ကြီးတွေ လမ်းပေါ်ထွက်မဲဆွယ် စည်းရုံး အင်အားပြနေတာတွေကို ခွင့်ပြုထားတာကျတော့လည်း မတရားသလို ခံစားရပါတယ် ။

၄ ။ တစ်ခုခု ကြေငြာမယ်ဆိုရင်လည်း ( ရှိတဲ့အင်အားနဲ့ မကြုံဖူးတဲ့ အခြေအနေတစ်ခုကို ရင်ဆိုင်နေရပါတယ်ဆိုတဲ့အကြောင်းပြချက်နဲ့ ) အမိန့်တွေကို ကပ်ပြီးကြေငြာတယ် ။

၅ ။ QR pass တွေလုပ်ခိုင်းတယ် အုတ်အော်သောင်းနင်းတွေ နဲ့ Privacy leak တွေဖြစ်ပြီး Security issue တွေဖြစ်တယ် ဝိုင်းထောက်ပြတဲ့သူတွေကိုတောင် မကျေနပ်သလို ပုံစံမျိုးတွေ နဲ့စာထွက်လာတယ် အဲ့ စစ်သလားဆိုတော့လည်း အခုထို ( အပြင်ကို Essential business အနေနဲ့ QR Pass ရထားသူအနေနဲ့ပြောရရင် ) တစ်ကြိမ်မှ စစ်တာ မကြုံရသေးဘူး ။

၆ ။ လမ်းပေါ်မှာ ခြင်းခတ်နေတဲ့သူတွေလည်းရှိတယ် အင်းလျားကန်ဘောင်ပေါ် လမ်းလျှောက်နေသူတွေ ပြေးနေသူတွေရှိသေးတယ် သူတို့ကရော Essential business ကလူတွေတဲ့လား ။ တကယ်ဆိုရင် အမိန့်ဆိုတာ မျှတမှုရှိပြီး တည်မြဲမှုရှိရပါမယ် ။

၇ ။ အစိုးရက Fully Lock down လုပ်ဖို့ Plan မရှိပါဘူးဆိုတာမျိုးကို အစိုးရအသိုင်းအဝိုင်းမှာ ပြောပြီး ရပ်ကွက်ထဲကျတော့ အချိုးကျ စားဝတ်နေရေးစီစဉ်ဖို့ ဝေငှဖို့ Ration စနစ်ကိုကြိုပြင်ကြပါလို့ဆိုတယ် ။ ဘာတွေလဲမသိပါဘူး ။

ဆက်ရေးနေရင်အများကြီးမို့ ဒီလောက်နဲ့ရပ်ပါမယ် ။ First wave တုန်းက နိုင်လိုက်တယ်ဆိုတာ ဂုဏ်ယူစရာမဟုတ်ပါဘူး ။ သင်္ကြန်ပိတ်ရက် ခံနေတာရယ်လူတွေရင်ထဲအကြောက်တရားကိန်းအောင်းနေတာရယ် ကြောင့် လုံး၀ လမ်းတွေပေါ် လူမရှိလို့ နိုင်ခဲ့တာပါ ။ အခု Second wave က ၁၀၀၀ ကျော်နေ့စဉ်တွေ့နေတာတောင် မနက်ဖြန်စားစာရာမရှိရင်ဘယ်လိုလုပ်မလဲတွေးပူသူတွေအများကြီးဖြစ်နေပါပြီ ။ SME တွေတော်တော်များများ ယိုင်နဲ့ကုန်ပါပြီ ။

အကယ်၍သာ ပေါ့လေ

၁ ။ ရခိုင်မှာ စပြီး out break ဖြစ်ကထဲက ရခိုင်ကို တင်းကြပ်ပြီး အချိန်နဲ့တပြေးညီ ရန်ကုန်ကိုလည်း Full Lock down ချခဲ့မယ်ဆိုရင်
( ဘယ်အချိန်ကတည်းက ပိုးသယ်သူတွေက ရန်ကုန်ထဲရောက်နှင့်နေမယ်မှန်းမသိလို့ )

၂ ။ ရခိုင် ကနေ ရန်ကုန်ကို ဝင်လာသူအားလုံးကို Trace ကောင်းကောင်းလုပ်ပြီး Contact ကို သေချာလိုက်ခဲ့မယ်ဆိုရင်

၃ ။ လူတွေ စတောင်းဆိုးကတည်းက အိမ်ထောင်စုတွေကို ၂ သောင်းထောက်ပံ့ငွေပေးကထဲက Fully Lock down လုပ်ခဲ့မယ်ဆိုရင်

၄ ။ မဲ ဆွယ်တာတွေ အင်အားပြတာတွေကို လမ်းပေါ်ထွက်ခွင့်မပြုခဲ့ဘူးဆိုရင်

၅ ။ + အားလုံး ( အနံ့ပျောက်သူကအစ ) ဆေးရုံတင်တဲ့ Policy ကို အရင်တတည်းကချိန်းခဲ့မယ်ဆိုရင် ..
လူနာတွေကို code စနစ်နဲ့လုပ်ပေးခဲ့မယ်ဆိုရင် ..

အခုလည်း ထပ်မံကြေငြာချက်တွေက အချိန်မှီပါစေလို့ ဆုတောင်းရင်းနဲ့ ဒီစာကိုရေးလိုက်ပါတယ် ။

သက်တန့်ချို
5 Oct-2020



 

အတွေးစ တချို့ ( ၁)

မုန်းနေတာထက်
မမုန်းတော့တာ ပိုကြောက်ဖို့ကောင်းတယ်

လစ်လျှုရှုတာထက်
ခံစားချက်မဲ့သွားတာ ပိုကြောက်ဖို့ကောင်းတယ်

သွေးအေးနေတာထက်
ဥပက္ခာပြုသွားနိုင်တာက ပိုကြောက်ဖို့ကောင်းတယ်

သက်တန့်ချို
2nd Oct 2020

တိုင်းတာခြင်း

မြင့်မြတ်ခြင်းအစစ်က
မင်းဘယ်လောက် ဂုဏ်ယူနိုင်တယ်ဆိုတာမဟုတ်ဘူး
မင်းဘယ်လောက် ကိုယ်ကျိုးစွန့်နိုင်သလဲဆိုတာနဲ့တိုင်းတာတယ်

အောင်မြင်ခြင်းအစစ်က
မင်းဘယ်လောက်ချမ်းသာကြွယ်၀တယ်ဆိုတာမဟုတ်ဘူး
မင်းဘယ်လောက် လူတွေကို ကူညီပေးခဲ့သလဲဆိုတာနဲ့တိုင်းတာတယ်

လူပီသခြင်းအစစ်က
မင်းဘယ်လောက် ရိုးသားတယ်ဆိုတာမဟုတ်ဘူး
မင်းကြောင့် ဒုက္ခရောက်ရသူရှိမရှိဆိုတာနဲ့တိုင်းတာတယ်

သက်တန့်ချို
1st-Oct 2020

မရှုံးသေးပါဘူး

မရှုံးသေးပါဘူး
အတူရုန်းကြရင်
အောင်မြင်မှာ သေချာပါတယ် ။

အလင်းကိုမြင်နေသရွေ့
အမှောင်မိုက်ဆုံးနေ့တွေကို ကျော်ဖြတ်ရမှာပဲ

အားမငယ်ပါနဲ့
ဖျားနာသူကိုကူဖို့
သူတို့ရှိကြတယ်

ဒါဏ်ရာတွေနဲ့ကမ္ဘာကြီးရဲ့
အလင်းတံခါးကိုဆွဲဖွင့်ဖို့
ရဲရင့် နှလုံးသားကိုယ်စီနဲ့

မနက်ဖြန်ဆိုတာကို မျှော်လင့်ရင်
မိုးလင်းမှာမကြောက်ပါနဲ့ ။

သက်တန့်ချို
30-Sept 2020

ကြိုလည်းကြိုဆိုပါတယ် .. ပြင်ဆင်ချိန်လေးတော့ပေးပါ

ကြိုလည်းကြိုဆိုပါတယ် .. ပြင်ဆင်ချိန်လေးတော့ပေးပါ

ရန်ကုန်ကို မနေ့ည၈ နာရီသတင်းမှာ Semi-lock down ပုံစံမျိုး ထပ်မံတိုးလိုက်တဲ့ restriction တွေနဲ့အတူ Stay at home ပြုလုပ်ခဲ့တာ အားလုံးသိကြပြီးဖြစ်မှာပါ

အခုလို အမိန့်ထွက်လာတာ ကြိုဆိုပါတယ် (နောက်တောင်ကျသွားသလားတောင်ထင်မိပါတယ် ) Stay home လုပ်ခိုင်းထားတာကို ထပ်ပြီး stay home လုပ်ခိုင်းတာလားလည်း ပြောနေကြသူတွေရှိပါတယ်

အမှန်တော့ယခင် stay home နဲ့ ယခု stay home မတူပါဘူး အခုက အလုပ်တွေပါ ပိတ်ခိုင်းတဲ့အတွက် Semi-LD ပုံစံမျိုးပါ

ဒီနေရာမှာ တစ်ခု ပြောချင်တာက အစိုးရအဖွဲ့က ဘာလို့များ အမိန့်တွေကို ကပ်ကပ်ထုတ်နေရသလဲဆိုတာပါပဲ

၂၁ ရက်နေ့ မနက်က ၈ နာရီ စအသက်ဝင်မယ့်အမိန့်ကို ၂၀ ရက်နေ့ ည ၈ နာရီမှ အမိန့်ထုတ်တယ်

ဒီတော့ ရပ်နားရမယ့်လုပ်ငန်းတွေနဲ့ Work from home လုပ်ရမယ့်လုပ်ငန်း တွေက သိသိချင်းပဲ အလုပ်ထဲကို ညတွင်းချင်း ကွန်ပြူတာတွေသွားသယ်ရတော့မလို
မနက် ၄ နာရီကနေ မနက် ၈ နာရီအတွင်းအလုပ်ကိုအမြန်သွားပြီး ဖိုင်တွေသွားသယ် ကွန်ပြူတာတွေသွားသယ်ရမလိုဖြစ်ကုန်ကြမှာမှာပါ

အမှန်ဆိုရင် စနေညလောက်က အမိန့်ထုတ်လိုက်ရင် တနင်္ဂနွေ ၁ ရက်လုံးပြင်ဆင်ချိန်ရလိုက်ကြမှာပါ

အမိန့်ကိုတော်တော်များများလည်း ဘာသာပြန် ထားကြလို့ ( အမှန်တော့မြန်မာစာကို မြန်မာလို ဘာသာပြန်ရတာ ) နားလည်လောက်ကြမယ်ထင်ပါတယ်

ကိုယ်နားလည်သလောက်ကတော့ တိုတို တုတ်တုတ်ပဲ

- အစိုးရ အလုပ်တွေအားလုံး ၂ ပတ်တက် ၂ ပတ် WFH
- Essential business တွေကလွဲလို့ ကျန်တဲ့အလုပ်တွေအားလုံး WFH လုပ် ( WFH လုပ်မရတဲ့အလုပ်တွေတော့ နားပေါ့ အဲ့လိုပဲနားလည်တယ် )
- Organization တွေ Company တွေ အိမ်ကနေ WFH လုပ် ( ဒီနေရာမှာ အထက်ပါ Essential business တွေကတော့လုပ်လို့ရတယ်လို့နားလည်ထားရမယ် )
ကျန်တာကတော့အရင်အတိုင်းပဲ
- CMP လုပ်ငန်းတွေနဲ့ စက်ရုံအလုပ်ရုံတွေကတော့ ၂၄ ကစပြီး နောက်လ ၇ ရက်နေ့အထိ ပိတ်ကိုပိတ်ထားပေးရမယ်
- စျေး ၁ ယောက်ထွက်ဝယ်လို့ရ ၊ ဆေးခန်းဆေးရုံသွားရင် ၂ ယောက်သွား ၊ Mask တပ် ၊ ဖယ်ရီတွေနဲ့ ဖြတ်သန်းခွင့်ပြုထားတဲယာဉ်တွေကိုသာ ရပ်ကွက်ထဲဝင်ခွင့်ပြုမယ်
အဲ .. ကားနဲ့သွားမယ်ဆိုရင်တော့ စျေးဝယ် ၁ + ဒရိုင်ဘာ ၁
ကားနဲ့ဆေးခန်းသွားမယ်ဆိုရင် လူ ၂ + ဒရိုင်ဘာ ၁ သွားလို့ရတယ်လို့ နားလည်ရမယ်

Stay Home ထဲတွင်မပါဝင်သော Essentail business ကတော့
၁ ။ စက်သုံးဆီ
၂ ။ စားသောက်ကုန် ၊ သားငါး ၊ အအေးခန်း လုပ်ငန်း
၃ ။ ဆေးကုမ္မဏီတွေ ဆေးဆိုင်တွေ ဆေးဝါးထုတ်လုပ်ဖြန့်သူတွေ ဆေးပစ္စည်းတင်သွင်းသူတွေ
၄ ။ Personal hygiene နဲ့ပတ်သတ်တဲ့ ပစ္စည်း ထုတ်တဲ့စက်ရုံတွေကတော့ ပိတ်စရာမလို အလုပ်သွားလို့ရတယ်လို့ဆိုတယ် ။

အထက်မှာ ရေးထားသလို ရှင်းလားဆိုတော့လည်း မရှင်းသေးဘူး ဒီထက်ပိုရှုပ်တာတွေရှိသေးတယ် အဲ့တော့ပုံထဲကကအတိုင်းပဲ အစိမ်း Green တွေက အပြင်ထွက်အလုပ်လုပ်လို့ရတယ်
အနီတွေက ၂၄ ကနေ နောက်လ ၇ ထိပိတ် ၊ ကျန်တဲ့အလုပ်အားလုံး အပြင်မထွက်ရ WFH ပါ ဘယ်အထိလဲဆိုတာ မပါပါ ဒီတော့နောက်ထပ်အမိန့်မထွက်မချင်းဖြစ်မှာပါ

အမြဲ (negative ) မြင်တာမဟုတ်ပါဘူး pressure တွေနဲ့လုပ်နေကြရတာအားလုံးနားလည်ပါတယ်
ဒါပေမယ့် နောက်ဆိုရင် ပြင်ဆင်ချိန်လေးတော့ပေးပါလား ခင်ဗျာ ။

သက်တန့်ချို
၂၁-စက်တင်ဘာ ၂၀၂၀

အရမ်းနောက်မကျစေဖို့ဆုတောင်းပါတယ်

ဧရာ၀တီသတင်းဌာနက ပုံလေးကိုယူသုံးပါရစေ

မနေ့ကညပိုင်းကြေငြာချက် ၁၄၈ နဲ့ ဒီမနက် ၈ နာရီကြေငြာချက် ၂၅၆ ပေါင်းလိုက်ရင်
၄၀၄ ဦး (ပ + ဒု အသုတ် ) တွေ့ခဲ့ပါတယ်

လူတွေဟာ အခုချိန်မှာ စားဝတ်နေရေးပြေလည်တဲ့သူ လက်ချိုးရေလို့ရပါတယ်
တချို့လည်း ရပ်လိုက်ကြရပြီ
တချို့လည်းအလုပ်လက်မဲ့ဖြစ်ကြရပြီ
တချို့လည်း တောင့်ခံထားနေကြရပြီ
တချို့လည်း မျှော်လင့်ချက်တွေမဲ့ခဲ့ကြပြီ

COVID ရဲ့ ဆိုးကျိုးတွေဟာ ပေါ့သေးသေးမဟုတ်မှန်းလည်းသိခဲ့ကြသလို
ကြောက်စရာကောင်းမှန်းလည်း သိခဲ့ကြရပြီ

ထွက်ပေါ်လာတဲ့ Result တွေအရ travel histroy မရှိ Contact မရှိပဲ + ထွက်ခဲ့ကြသူတွေ အများကြီး
တချို့ကလည်း fever clinic ရောက်မှ မသင်္ကာလို့ swab စစ်ခဲ့ကြသူတွေ
တချို့လည်း အနံ့ပျောက်နေလို့ မသင်္ကာလို့ စစ်မှ တွေ့ခဲ့ကြသူတွေ
တချို့ကလည်း အခြားရောဂါနဲ့ဆေးရုံရောက်ပြီး symptom တူလို့ စစ်မှ သိခဲ့ကြသူတွေ

ပြဿနာက  Local transmission ကြီးက ပီပီပြင်ပြင်ဖြစ်ပေါ်နေတာပါပဲ
ဒီ Local Transmission ကို ဖြတ်ဖို့ အရမ်းအရေးကြီးတယ်ဆိုတာ လူတိုင်းသိပါတယ်
Local transmission ကို ဖြတ်ဖို့ဆိုရင် ပထမဆုံး လူတွေ အိမ်ထဲနေဖို့လိုတယ်
အိမ်ထဲနေဖို့ဆိုတာ တစ်နေ့လုပ်တစ်နေ့စားတွေအတွက်အဆင်မပြေဘူးဆိုတာ မှန်တယ်
ဒါပေမယ့် ဘယ်လောက်ကြာကြာနေရမလဲဆိုတဲ့အပေါ်မူတည်တယ်

၁၄ ရက်ပဲ ...
ဟုတ်တယ် ၁၄ ရက်ဆိုတာ transmission ကို ဖြတ်ဖို့လုံလောက်တဲ့အချိန်မှန်းမနေ့ကရေးခဲ့တဲ့ ပို့စ်မှာ လည်း ရေးခဲ့ပါတယ်
မနေ့ကအထိ အယောက် ၆၀ ဆုံးပါးခဲ့ပြီး ဒီမနက် +1 death ထပ်တိုးထားတယ်
အာဆီယံနိုင်ငံထဲမှာ ဖိလစ်ပိုင် ၊ အင်ဒို ၊ စင်ကာပူ ၊ မလေးရှားပြီးရင် မြန်မာပဲ
မြန်မာက ထိုင်းကိုလည်းကျော်သွားပြီ ကောင်းသောကျော်ခြင်းမဟုတ် မကောင်းသော ကျော်ခြင်းမျိုးနဲ့

သက်ဆိုင်ရာလူကြီးမင်းတွေလည်း အခုပို့စ်ထဲမှာဖော်ပြထားတဲ့ ပုံလေးထဲကလို
မျှော်လင့်ချက်မဲ့နေတဲ့စျေးသည်တွေအပြင်
အလုပ်လက်မဲ့ဖြစ်နေတဲ့ အလုပ်သမားတွေ
ရပ်ဆိုင်းထားရတဲ့ စီးပွားရေးလုပ်ငန်းတွေ အပြင်
တနိုင်ငံလုံးက ကျန်းမာရေးဝန်ထမ်းတွေ Volunteer တွေကို ငဲ့ညှာသောအားဖြင့်
တစ်နိုင်ငံလုံး ၁၄ ရက်လောက် နားစေချင်တယ် LD လုပ်စေချင်ပါကြောင်းထပ်ပြောပါရစေ

ဒီလို ၁၄ ရက်နားခြင်းအားဖြင့် လူနာ တိုးလာတွေ လျော့သွားမယ်
ကျန်းမာရေးဝန်ထမ်းတွေလည်း ဝန်ထုပ်ဝန်ပိုးလျော့လာမယ်
Volunteer တွေလည်း ခြေကုန်လက်ပမ်းကျတာ သက်သာမယ်
ဆေးရုံတွေနဲ့ Q Center တွေမှာလည်း လူနာတွေစုပြုံနေတာကိုသက်သာစေမှာအမှန်ပါပဲ ။

မနေ့ကရေးခဲ့သလိုပဲ သက်ဆိုင်ရာ Law Enforcement ထုတ်သူတွေအနေနဲ့
လက်ရှိအခြေအနေကိုသုံးသပ်ပြီး ဆုံးဖြတ်ချက်ချတဲ့အချိန်ဟာ
" အရမ်းနောက်မကျစေဖို့မျှော်လင့်တာပါပဲ "

အားတက်စရာက မနေ့က ခိုင်မာတဲ့ သတင်းရင်းမြစ်တစ်ခုမှာ ဖော်ပြထားပုံအရ
" ရန်ကုန်ကို LD လုပ်ရန်အစီအစဉ်မရှိပါတဲ့ "

ဟုတ်ကဲ့ အသက်ပေါင်းများစွာ ရင်းနှီးလိုက်ရတဲ့ plan တွေမဖြစ်ကြပါစေနဲ့လို့ဆုတောင်းပါတယ် ။

ယနေ့ ကမ္ဘာမှာ ပိုးတွေ့သူပေါင်း 30,348,579
ပိုးတွေ့သေဆုံး 950,545 ဦးရှိပါပြီ

ယနေ့မြန်မာမှာ ပိုးတွေ့သူပေါင်း 4299
ပိုးတွေ့သေဆုံး 61 ဦး ရှိပါပြီ

သက်တန့်ချို
18 Sept-2020

Covid-19 Positive လူနာ ၁၁ ဦး ထပ်မံကွယ်လွန်

ရန်ကုန်ကို ကယ်တင်မယ့် (၁၄) ရက်

 

ရန်ကုန်ကို ကယ်တင်မယ့် (၁၄) ရက်

လူတစ်ယောက်ဟာ Covid-19 virus ဝင်ပြီးတာနဲ့ ရောဂါလက္ခဏာတွေပြဖို့ ၅ ရက်ကနေ ၆ ရက်အထိကြာနိုင်သလို ၁၄ ရက်ထိလည်းကြာနိုင်တယ်လို့ဆိုတယ် ။ အဲ့ဒါကို Pre-sympotomatic ( လက္ခဏာ ) မပြသေးခင်အချိန်လို့ခေါ်ကြတာပေါ့လေ ။ ဒါကလည်း လူတစ်ယောက်နဲ့တစ်ယောက်ရဲ့ကိုယ်ခံအား ၊ အနေအထိုင် ၊ ရောဂါအခံရှိမရှိ အဲ့ဒါတွေအပေါ်မူတည်ပြီး ကွာနိုင်တာပဲ ။

Bloomberg တို့ Dailymail တို့ဆိုဒ်တွေမှာတော့ လူတစ်ယောက်ဟာ COVID-19 ကူးစက်ခံရပြီး ၁၁ ရက်မြောက်နေ့နောက်ပိုင်းမှာ အခြားလူတွေကို မကူးစက်နိုင်တော့ဘူးလို့ဆိုတယ် ။ စင်ကာပူ Study မှာလည်း ဒါကို ဖော်ပြထားတယ် - https://bloom.bg/33z2NXH , https://bit.ly/3mspllC

DVB ကဖော်ပြထားတဲ့ ကိုဗစ်ရောဂါပိုးက (၁၁)ရက်ကျော်ရင် တခြားသူကိုမကူးစက်နိုင်တော့လို့ လေ့လာတွေ့ရှိဆိုတဲ့သတင်း -  https://bit.ly/2FJnHLw

ထားပါတော့ WHO ထဲဝင်ဖတ်ကြည့်မယ်ဆိုရင် Isolation Criteria မှာ Update ဘာဖြည့်ထားလဲဆိုရင် ဆေးရုံမှာ သီးသန့် ခွဲထားရာကနေ ဘယ်အချိန်မှာ ဆေးရုံပေးဆင်းသလဲဆိုတော့

* ရောဂါလက္ခဏာပြတဲ့သူတွေကို လက္ခာပြပြီး ၁၀ရက်+လက္ခာမပြတော့တဲ့နောက်ထပ် ၃ ရက် ( အဖျားမရှိရ ၊ အသက်ရှုလမ်းကြောင်းဆိုင်ရာ လက္ခဏာများမရှိရ )ပေါင်း ၁၃ ရက်    
* ရောဂါလက္ခဏာ မပြတဲ့သူတွေဆိုရင် SARS-CoV-2 positive test ဖြစ်ပြီး ၁၀ ရက် လို့ရေးထားပါတယ် ။ https://bit.ly/3ksqxUu

ဆိုတော့ ချုံပြီးကြည့်ရင် လူတစ်ယောက် + ဖြစ်ပြီး ၁၁ ရက်ကျော်ရင် အခြား သူတစ်ယောက်ကို ကူးဖို့အလားအလာနည်းသွားပြီပဲ မကူးနိုင်တော့ဘူးပဲ
ဒီတော့ ပိုးတွေကူးနေတာက လူတွေအပြင်ထွက်နေလို့ ကူးနေတာသိသာနေတာပဲ 
ဒီတော့ ဒီ ၁၄ ရက်ကို သင်္ကြန်တုန်းကပိတ်ရက်လို အပြင်မထွက်ရ Stay Home လုပ်လိုက်ပြီး Circuit breaking days တွေလုပ်လိုက်ရင် ပိုးတွေ့သူဦးရေ ၀ုန်းကနဲထိုးကျသွားနိုင်ဖို့မျှော်လင့်တာပါ ။

၁၄ ရက် LD လုပ်ခြင်းဖြင့်ဖြစ်လာနိုင်တဲ့ဆိုးကျိုး

- စီးပွားရေး ထိခိုက်ပါမယ် လုပ်ငန်းတွေ အလုပ်တွေအားလုံး ၁၄ ရက်နားရပါမယ် ဝင်ငွေရပ်ကုန်ပါမယ်
- လက်လုပ်လက်စားတွေ ဝင်ငွေမရှိတော့လို့ စားဝတ်နေရေးပိုခက်ခဲသွားပါမယ်

၁၄ ရက် LD လုပ်ခြင်းဖြင့် ဖြစ်လာနိုင်တဲ့ကောင်းကျိုး

- Transmission rate က အတိုင်းအတာတစ်ခုထိရပ်သွားပြီး + cases တွေနည်းသွားပါမယ်
- ကူးစက်နေတဲ့ Circuit လမ်းကြောင်းကို ၁၄ ရက်တိတိဖြတ်ချလိုက်တာဖြစ်လို့ အခြေအနေပြန်ကောင်းလာမယ်

ဆိုးကျိုး ဖြစ်တဲ့ စီးပွားရေး ၁၄ ရက်စာ ထိခိုက်တာကြောင့် ဒီတိုင်းပဲဆက်သွားမလား
ဒါမှမဟုတ် ၁၄ ရက်စာ စီးပွားရေး နဲ့ဝင်ငွေကို မေ့ထားပြီး ကျန်းမာရေးကို ရွေးမလားဆိုတာကတော့ Law Enforcement လုပ်တဲ့ သူတွေအပေါ်မူတည်ပါတယ်

ပြိုင်တူတွန်းရင်ရွေ့မှာပါ ၁၄ရက်စာ အတွက် မရှိဆင်းရဲသားတွေကို
-နိုင်ငံတော်ကလည်းကူညီမယ်
-ပြည်သူတွေက လှူကြမယ်
-ဒီ ၁၄ ရက်ကိုတောင့်ခံထားကြမယ်
ပြည်သူတွေ ရုတ်ရုတ်သဲသဲနဲ့ ဆိုင်တွေမှာ မတိုးကြရလေအောင်ဘယ်နေ့ စမယ်ဆိုတာ ကို စကြေငြာထားမယ်
အခုလိုဖြစ်တဲ့နေရာလေးတွေကွက်ပြီး ပိတ်ပိတ်နေတာက ဘာမှမထူးပဲ +rate က တက်နေစမြဲမို့ strategy ပြောင်းဖို့အကြံပြုပါတယ်

ယနေ့ကမ္ဘာ
ပိုးတွေ့သူပေါင်း 30,034,508 ရှိပြီး
သေဆုံးသူပေါင်း 945,092 ရှိပါတယ်
21,800,991 ဦးရေပြန်ကောင်းလာပါတယ်

အိမ်နီးနားချင်းနိုင်ငံတွေရဲ့အခြေအနေက ပုံထဲမှာပြထားပေးပါတယ်

ယနေ့ မြန်မာ
ပိုးတွေ့သူပေါင်း - ၃၈၉၄
ပိုးတွေ့သေဆုံး - ၄၆ ယောက်နဲ့
ကုသဆဲ - ၂၉၄၀ ရှိပြီး
၉၀၈ ယောက်ပြန်ကောင်းထားပါတယ် ။

14 Days LD လုပ်သင့်မလုပ်သင့်ဆိုတာ အဖက်ဖက်ကနေစဉ်းစားရတာမို့ လွယ်လွယ် ဆုံးဖြတ်လို့မရမှန်းနားလည်ပါတယ်
ဒါပေမယ့် တစ်ခုလေးပဲ
သိပ် နောက်ကျသွားမှာ စိုးပါတယ် ။

သက်တန့်ချို
17 Sep-2020

 

သူတစ်ပါးရဲ့အမြင်နဲ့မရှင်သန်ပါနဲ့

ဘယ်သူ့အမြင်မှ မယုံကြည်နဲ့
ကိုယ့်မျက်စိက အမှန်တရားကို မြင်နေရတာပဲ

ဘယ်သူ့စကားမှ မယုံကြည်နဲ့
ကိုယ့်နားနှစ်ဖက်က အမှန်တရားကို ကြားနေရတာပဲ

ဘယ်သူ့အတွေးအခေါ်မှ မယုံကြည်နဲ့
ကိုယ့်အသိဉာဏ်နဲ့ အမှန်တရားကို တွေးတတ်တာပဲ

သူတစ်ပါး အမြင်နဲ့အသက်ရှင်ရတာ
ရှက်ဖို့ကောင်းတယ် ။

သူတစ်ပါးစကားကို လိုက်ခံစားတတ်တာ
ရှက်ဖို့ကောင်းတယ် ။

သူတစ်ပါးအတွေးအခေါ်ကိုမှီခိုတတ်တာ
ရှက်ဖို့ကောင်းတယ် ။

သက်တန့်ချို
25-April 2020

ကံကောင်းတယ်ဆိုတာ

ဘ၀မှာ သေချာတာ ဘာမှမရှိသလို
ဆုတောင်းတိုင်းလည်းပြည့်မှာမဟုတ်ဘူး ။

မျှော်လင့်တိုင်းလည်းဖြစ်မလာသလို
ဖြောင့်ဖြူးတဲ့လမ်းဆိုတာလည်းရှိမှာမဟုတ်ဘူး ။

မနက်ဖြန်ထိ အသက်ရှင်နေသေးရင်
ကံကောင်းတာပဲ မဟုတ်လား ?

ကိုယ်ချစ်တဲ့သူတွေကို
မြင်နေခွင့်ရသေးရင် ကံကောင်းတာပဲ မဟုတ်လား ?

ဖြတ်သန်းခဲ့တဲ့အချိန်တွေအားလုံး
နောင်တ နည်းခဲ့ရင် ကံကောင်းတာပဲ မဟုတ်လား ?

သက်တန့်ချို
24-April 2020

လစ်လျုရှုပါ

ကိုယ့်ကို ဒေါသဖြစ်အောင်လုပ်တိုင်း
ဥပက္ခာပြုလိုက်ပါ ။

ကိုယ့်ကို နိမ့်ကျအောင်လုပ်တိုင်း
မျက်နှာလွှဲလိုက်ပါ ။

ကိုယ့်ကို မုန်းတီးအောင်လုပ်တိုင်း
လစ်လျူရှုလိုက်ပါ ။

တစ်ယောက်နဲ့တစ်ယောက်ကျောချင်းခိုင်းဖို့
တစ်စက္ကန့်လောက်ပဲ လိုအပ်သလို

တစ်ယောက်နဲ့တစ်ယောက် ပြန်ရင်းနှီးသွားဖို့
စစ်မှန်ခြင်းတစ်ခုသာ လိုအပ်ပါတယ် ။

သက်တန့်ချို
23-April 2020

မလော့တလော့မဒေါင်းတဒေါင်းဖြစ်နေတဲ့ရန်ကုန်

ကမ္ဘာပေါ်မှာ COVID-19 ရောဂါဖြစ်ပြီး ပိတ်လိုက်တဲ့ Closed cases ပေါင်း အခု ဒီစာရေးတဲ့အချိန်ထိ 906,413 ခုရှိတယ် ။

အဲ့ဒီအထဲကမှ ၈၀% ဖြစ်တဲ့ 722,150 ယောက်က Recover ဖြစ်ပြီးဆေရုံဆင်းသွားကြပေမယ့်
၂၀% ဖြစ်တဲ့လူပေါင်း 184,263 ယောက်ကတော့သေဆုံးသွားကြပါတယ် ။

မလော့တလော့
မဒေါင်းတဒေါင်း
မတင်းတတင်း လုပ်နေတဲ့ ရန်ကုန်ဟာ
မကြာခင် Epic-Center မဖြစ်လာပါစေနဲ့လို့
လမ်းပေါ်စုစု စုစု ထွက်လာတဲ့ လူစုလေးတွေကို ကြည့်ပြီး သက်ပြင်းချရင်းရေးမိပါတယ် ။



#သက်တန့်ချို
#ttc_status

ငေးကြည့်ယုံပဲတတ်နိုင်ခဲ့တယ်

တချို့လူတွေက လိုလေသေးမရှိအောင်ပြည့်စုံလွန်းတယ်
ငေးကြည့်ယုံပဲတတ်နိုင်တယ် ။

တချို့လူတွေက ပြောစရာအပြစ်မရှိအောင် ကောင်းမွန်လွန်းတယ်
ငေးကြည့်ယုံပဲတတ်နိုင်တယ် ။

တချို့လူတွေက ရှိသမျှ ပိုလျှံနေလောက်အောင်လုံလောက်လွန်းတယ်
ငေးကြည့်ယုံပဲတတ်နိုင်တယ် ။

ဒီလို ငေးကြည့်နေယုံကပဲ
ကိုယ့်ရဲ့ အရှိတရားကို သင်ပေးတယ်
ကိုယ့်ရဲ့ ပစ္စုပ္ပန်ကို သတိရစေတယ်
ကိုယ့်ရဲ့ အသိဉာဏ်ကို သင်ခန်းစာပေးတယ် ။

တချို့သော မျက်ရည်တွေက ခွန်အားဖြစ်စေပေမယ့်
တချို့သော မျက်ရည်တွေက နာကျင်မှုနဲ့ပင်ပန်းစေပါတယ် ။

" ကိုယ်ခေါင်းငိုက်စိုက်ကျနေရတဲ့အခိုက်အတန့်ပေါင်းများစွာမှာ
ကိုယ်ကိုယ်တိုင်ပဲ အားယူပြန်ထရမယ်မဟုတ်လား "

သက်တန့်ချို
20-April 2020

လူကောင်းဆိုတာ

လူကောင်းဆိုတာ

🌼 ကိုယ့်ကြောင့် သူတစ်ပါးကို မပျက်စီးစေသူ

🌼 ကိုယ့်အမှားကို သိရှိပြုပြင်ပြီးနောက်ထပ်အမှား ထပ်မကျူးလွန်သူ

🌼 လူတော်တစ်ယောက်မဟုတ်ရင်တောင် လူယုတ်မာတစ်ယောက်မဖြစ်အောင်နေထိုင်သူ

🌼 မကောင်းတာကို မကောင်းတာမှန်းသိရှိ ရှောင်ကြဉ်တတ်သူ

🌼 မမြင်ကွယ်ရာမှာ ပျက်စီးခြင်းတရားကို စွန့်လွှတ်တတ်သူ ကိုခေါ်ပါတယ် ။

သက်တန့်ချို
9 April 2020

ခေတ်ကိုက ...

ခေတ်ကိုက ...

မျက်နှာချင်းဆိုင်ရမှာထက်
ကျောချင်းသာ ခိုင်းနေကြစို့ ။

ကမ္ဘာ့ကပ်ကြီးက
ဒီတစ်ခါ ရိုးရော ရိုးရဲ့လား
တန်ဖိုးထားတဲ့ လူသားချင်းယုံကြည်မှုပါ
လွင့်စင်ကွဲရှ ။

လူတွေချစ်တယ်ဆိုတာ
တကယ်ပဲ သူတို့ကိုမထိခိုက်သရွေ့တဲ့လား ?

စကားစမပြောခင်
နောက်ဆုတ်လိုက်ကြ
လက်စမဆွဲခင်
ဦးညွှတ်လိုက်ကြ
ခေတ်ကိုက အဲ့ဒီလို ။

လက်ဆေးပြီး ငါ့တို့မျက်နှာတွေအုပ်ကြမယ်
တစ်ယောက်ရဲ့ ကာဗွန်ဒိုင်အောက်ဆိုဒ်ကို
တစ်ယောက်က မှားမရှုမိဖို့အရေး
လေထုကိုခွဲခြမ်းစိတ်ဖြာသံတွေဆူညံနေတယ် ။

ခေတ်ပျက်ကြီးရဲ့စိန်ခေါ်သံကြားမှာ
ဘယ်သူတွေက လူသားဆန်လဲ
ဘယ်သူတွေက အတ္တကြီးလဲ

အို.. သူငယ်ချင်းတို့ရေ
အိမ်ထဲမှာပဲနေကြပါ
အပြင်မှာ မိစ္ဆာတွေ ကူးခတ်နေကြပုံများ
ခေတ်သစ်ငရဲကို ပျိုးနေကြသလို ။

ဟုတ်တယ် .. ခေတ်ကိုက
Mask တစ်ခု ၅၀၀ ကျပ်
နောက်တစ်ရက်အတွက်
ကျွန်တော်တို့ ဘယ်လို အသက်ဆက်ကြမလဲတဲ့

လူတွေဟာ မူတွေကြား
လူတွေဟာ သူစိမ်းဆန်မှုတွေကြား
လူတွေဟာ အို... ဝေးကွာ ။

ခေတ်ကိုက ..
အောက်ဆီဂျင်ကို လုရှုနေကြရသလို
သေခြင်းရှင်ခြင်းဟာ
အဓိပ္ပါယ်မဲ့မဲ့လာတယ် ။

သက်တန့်ချို
7.4.2020

Stay Home နေနေသူများ ထင်နေတာလေးဖြေကြည့်ပါလား

Stay Home နေနေသူများ ထင်နေတာလေးဖြေကြည့်ပါလား

မြန်မာနိုင်ငံဟာ တခြားနိုင်ငံတွေထက်ယှဉ်ရင် COVID-19 တွေ့ရှိမှုဟာ အလွန်နည်းပါတယ် ။
ဒီလိုနည်းပါးစွာတွေ့ရှိရတဲ့ ရလဒ်အပေါ် သင်ရော ဘယ်လိုထင်ပါသလဲ ။
အောက်က အဖြေ ၁၀ ခုထဲက ဘာဖြစ်မလဲ ဖြေသွားကြည့်ပါလား ။

၁ ။ ကံကောင်းလွန်းနေလို့ ။

၂ ။ Suspect စစ်တဲ့ တစ်နေ့တာအ‌ရေအတွက်နည်းနေလို့ ။

၃ ။ တကယ်ပဲ ပိုးကူးစက်မှုက နည်းပါးနေလို့ ။

၄ ။ Asymptomatic carrier တွေကို မဖော်ထုတ်နိုင်သေးလို့ ။

၅ ။ မြန်မာပြည်သူအားလုံးစည်းကမ်းလိုက်နာပြီး ဗုဒ္ဓဘာသာတိုင်းပြည်ဖြစ်နေလို့ ။

၆ ။ ထိတွေ့ကူးစက်သူ Q ခံရသူအားလုံးကို မစစ်နိုင်သေးလို့ ။

၇ ။ ကမ္ဘာလှည့်ခရီးသွား ဦးရေနည်းခဲ့လို့ ။

၈ ။ အစိုးရကိုင်တွယ်ဖြေရှင်းပုံ နည်းစနစ်မှန်ပြီး တိကျခဲ့လို့ ။

၉ ။ ကျန်းမာရေးနဲ့အားကစားဝန်ကြီးဌာနရဲ့အချိန်နဲ့တပြေးညီလုပ်ဆောင်ချက်တွေက မှန်ကန်ထိရောက်ခဲ့လို့ ။

၁၀ ။ စစ်နေတဲ့ Criteria လွဲနေလို့ ။

ဒီ (၁၀) ချက်ထဲမှာပါပဲ ကိုယ့်ဘာသာ ထင်နေတဲ့ယူဆချက်လေးတွေရှိရင်ရေးပေးသွားပါဦး ။

#သက်တန့်ချို
#7April2020

Mask တပ်တာနဲ့ပတ်သတ်ပြီး ၅.၄.၂၀၂၀ နေ့စွဲနဲ့ MOHS က ထုတ်ပြန်တဲ့ FAQ တွေကိုဖတ်ပြီးပြီလား ?

Mask တပ်တာနဲ့ပတ်သတ်ပြီး ၅.၄.၂၀၂၀ နေ့စွဲနဲ့ MOHS က ထုတ်ပြန်တဲ့ FAQ တွေကိုဖတ်ပြီးပြီလား ?

စာအရှည်ကြီးတွေဆိုတော့ အစအဆုံး တော်တော်များများ မဖတ်ရသေးလောက်ဘူး ။

အောက်မှာ လိုရင်းတိုရှင်းပဲပြန်ရေးထားတယ် ဖတ်ကြည့် ။

၁ ။ COVID က 60-140nm ရှိတဲ့အကောင်ကြီး ဗိုင်းရပ်စ်အမျိုးအစား ဒါကြောင့် ချောင်းဆိုး ၊ နှာချေရင် droplets တွေက ၃ပေ-၆ပေထိလွင့်နိုင်တယ် ။

၂ ။ လေထဲကနေတဆင့်ကူးစက်ဖို့ Aerosol transmission ဖြစ်ဖို့အတွက် 10 micrometer အောက်ဖြစ်ပြီး လေထက်ပေါ့ဖို့လို့လိုတဲ့အွက် လေထဲလွင့်ကူးဖို့အခြေအနေနည်းတယ်လို့ဆိုတယ် ။

၃ ။ Mask ၃ မျိုးရှိတယ်

က ။ Surgical Mask ( 10 micrometer အထက် droplest တွေကာကွယ်နိင် )

- ခွဲခန်းအပြင် အသက်ရှုလမ်းကြောင်းကနေတဆင့်ကူးတတ်တဲ့ရောဂါကာကွယ်တဲ့နေရာတွေမှာ သုံးတယ် ။

- Surgical Mask ထဲကို ပြင်ပကအမှုန်အမွှားတွေ ၂၅% ဝင်နိုင် ။ ရောဂါပိုးအကောင် ၁၀၀ ရှိရင် ၂၅ ကောင်ပဲဝင်တဲ့သဘော ။

- Surgical Mask တပ်ပြီး ချောင်းဆိုးရင် ကိုယ့်ဆီကအမှုန်အမွှားတွေ အပြင်ကို ၅၀%ရောက်နိုင် ။ ကိုယ့်မှာ အကောင် ၁၀၀ ရှိရင် အကောင် ၅၀ အပြင်ကိုရောက်နိုင်တဲ့သဘော ။

ခ ။ N95 (လေထဲက ရောဂါအမှုန်အမွှားတွေကို ၉၅% ကာကွယ်နိုင်တယ်

- သာမန်ပြည်သူများတပ်ရန်အကြံမပြု ။ High risk ကျန်းမာရေးဝန်ထမ်းတွေသာ တပ်ရမယ် ။

- N95 ထဲကို ပြင်ပအမှုန်အမွှားတွေ ၁% သာဝင်နိုင် ။ ရောဂါပိုးအကောင် ၁၀၀ ရှိရင် ၁ ကောင်ပဲဝင်နိုင်တဲ့သဘော ။

- N95 တပ်ပြီးချောင်းဆိုးရင် ကိုယ့်ဆီကအမှုန်အမွှားတွေအပြင်ကို ၃၀% ရောက်နိုင် ။ ကိုယ့်မှာ ပိုး ၁၀၀ ရှိရင် အကောင် ၃၀ အပြင်ရောက်နိုင်တဲ့သဘော ။

 ဂ ။ Cloth Mask ( ချည် ၊ လီနင် သားနဲ့လုပ်ထားတဲ့ အဝတ်နှာခေါင်းစည်း ) အမေရိကန် CDC ကတော့ ပိုးမွှားဝင်ရောက်ကာကွယ်ခြင်းနိမ့်ပေမယ့်ပြန်လျှော်ဖွပ်သုံးနိုင်တဲ့အတွက် cloth mask သုံးနိုင်ကြောင်းပြောထားတယ် ။

- Cloth Mask အတွင်းကိုအပြင်က အမှုန်အမွှားတွေ ၃၃% ဝင်နိုင် ။ ရောဂါပိုးအကောင် ၁၀၀ ရှိရင် ၃၃ ကောင်ဝင်နိုင်တဲ့သဘော ။

- Cloth Mask တပ်ပြီးချောင်းဆိုးရင် ကိုယ့်ဆီကအမှုန်အမွှားတွေ အပြင်ကို ၉၀%ရောက်နိုင် ။ ကိုယ့်မှာ ရောဂါပိုး ၁၀၀ ရှိရင်အကောင် ၉၀ အပြင်ရောက်နိုင်တဲ့သဘော ။

အသေးစိတ်အရှည်ကြီးဖတ်ချင်ရင် တော့ MOHS Page မှာသွားဖတ်ပါ ။

ထပ်ပြောပါ့မယ် Physical distancing ခေါ်ခေါ် Social Distancing ခေါ်ခေါ် ၃ ပေခွာတာထက် ၆ ပေခွာကြပါ ။

Droplets က ပိုးရှိသူချောင်းဆိုးရင် ၃ပေကနေ၆ပေအကွာထိရောက်နိုင်ကြောင်း အတိအလင်းဆိုထားပါတယ် ။

သက်တန့်ချို
6.4.2020

Blame လုပ်မှာလား Care လုပ်မှာလား

Blame လုပ်မှာလား Care လုပ်မှာလား

တစ်ခါတစ်ခါ လူတွေကပြောရတော်တော်ခက်ပါတယ် ။ အထူးသဖြင့် ကျွန်တော်တို့လူ့အသိုင်းအ၀ိုင်း Society မှာ ပိုဆိုးတယ် ။

ကိုယ့်ကို ထိခိုက်လာမယ့်အရာကိစ္စမျိုးဆိုရင် အသည်းအသန်ကာကွယ်တတ်ပြီး blame လုပ်တဲ့ပုံစံပြောင်းသွားတာတွေတွေ့နေရတယ် ။

ဒီ COVID လို့ခေါ်တဲ့ ကိုရိုနာဗိုင်းရပ်စ်သည် Airborne ပုံစံဖြစ်လာလို့လေကနေတဆင့်တောင် အလွယ်တကူ ကူးလာတဲ့သဘောရှိတယ် ။

ဒီအတွက်လည်း CDC ကအခုဆို Mask တပ်ဖို့ပြောပါပြီ ။ ဒီတော့ ပိုခက်သွားတာက source ရှာရတာပါ ။ Contact ရှာမရပဲ ကူးစက်ခံရသူတွေ မြန်မာပြည်မှာတွေ့လာရပြီ ။

ဒီနေရာမှာအဓိကရေးချင်တာက Blaming Culture ကိုပါ ။ ၁၄ ရက် Q လုပ်နေတဲ့သူတွေဟာ တရားခံတွေမဟုတ်သလို မတော်တဆ ကူးစက်ခံနေရသူတွေကလည်းတရားခံမဟုတ်ပါဘူး။

ဒီတော့ ရောဂါကူးစက်ခံရသူတွေကို blame လုပ်တာ ရွံသလိုလိုဆက်ဆံတာ နှိမ်တာတွေဟာ အလွန်ရှက်ဖို့ကောင်းပါတယ် ။

တရားခံအစစ်တွေက ဘယ်သူလဲသိလား ?

- ကိုယ့်မှာ ရောဂါရှိနေမှန်းသိရက်နဲ့ ၁၄ရက် Q မလုပ်ပဲ လုပ်အုပ်ကြား မသိသလို သွားနေသူတွေ

- ကိုယ့်ဟာ Travelling history ရှိသားနဲ့ စစ်မိသည်ဖြစ်စေ မစစ်မိသည်ဖြစ်စေ Q 14 days Home Stay မနေပဲ အပြင်လျှောက်ထွက်နေကြသူတွေ

- ဆရာဝန်တွေသူနာပြုတွေမေးတဲ့အခါ ကိုယ့်ရဲ့ history ကို လိမ်ညာဖြေခဲ့သူတွေ

အခြားနိုင်ငံတွေမှာလို history အမှန်မပြောသူတွေကို ဒါဏ်ပေးတဲ့စနစ်လည်း စသင့်နေပါပြီ ။

အခုအချိန်မှာ Q ခံနေရသူတွေရော Confirmed case တွေရောကို စနစ်တကျ Care လုပ်ပြီး စိတ်ဓါတ်ခွန်အားပေးမှအဆင်ပြေပါမယ် ။

 နိုင်ငံတကာမှာ ဒီရောဂါကူးစက်ခံရသူအချို့ လူမှုဝန်းကျင်က စွန့်ပယ်နေကြလို့ ကိုယ့်ကိုယ်ကို သတ်သေတဲ့အမှုတွေဖြစ်လာကြပါပြီ ။ ဒါက blaming လုပ်ခြင်းရဲ့ အကျိုးဆက်ပါ ။

အခုအချိန်မှာ COVID-19 ကို အသက်သာဆုံးကြုံနေရတဲ့နိုင်ငံအနေနဲ့ Q လုပ်နေသူတွေနဲ့ မတော်တဆ contact ရှိသူတွေ Confirmed လူနာတွေကို Victim တွေလိုသဘောမထားပဲ လူကိုလူလို့ပဲမြင်ကြပါ ။

ဘာကြောင့်လည်းဆိုတော့ ဒီအခြေအနေအရဆိုရင် ခင်ဗျားတို့ရော ကျွန်တော်တို့ရောတစ်ချိန်ချိန်မှာ Q ခံရသူ ဖြစ်နိုင်သလို contact မိသူတွေ confirmed ဖြစ်သူတွေဖြစ်သွားနိုင်ပါတယ် ။

ဒါကြောင့် အခုကတည်းက Victim blaming society ကို ပယ်ဖျက်ကြပါလို့ တိုက်တွန်းလိုပါတယ် ။

သက်တန့်ချို
4.4.2020

သင် ကိုရိုနာဗိုင်းရပ်စ်ကူးစက်ခံရရင် ဘာဖြစ်မှာလဲ ?

သင့်ခန္ဓာကိုယ်ထဲကို Coronavirus ဝင်ရင် ဘာဖြစ်မှာလဲဆိုတာကို ရှင်းလင်းတဲ့ animation နဲ့ Necleus Medical Media က အခုလိုဖော်ပြပေးထားပါတယ် ။ စိတ်ဝင်စားသူများ လေ့လာနိုင်ပါတယ် ။

သင်နဲ့သင့်ကလေးတွေကို Coronavirus ရန်ကနေဘယ်လိုကာကွယ်မလဲ ?

Dr.Panda Toto TIme ဆိုတဲ့ Channel က ရှင်းလင်းထားတဲ့ နားလည်လွယ်ကူတဲ့ သင်နဲ့သင့်ကလေးတွေကို COVID-19 ကနေ ဘယ်လိုကာကွယ်မလဲဆိုတဲ့ Video ဖြစ်ပါတယ် ။

မြင်ရတာလေးတွေလွဲနေလို့ပါ

သက်ဆိုင်ရာတာဝန်ရှိသူများ တည့်မတ်ပေးစေချင်ပါတယ် ။

Non Contact infrared Thermometer သုံးရင် လူနာ သို့မဟုတ် ကိုယ်တိုင်းမယ့်လူရဲ့ နဖူး သို့မဟုတ် နားထင်ရဲ့  3 to 15 cm အကွာတိုင်းရပါတယ်

ဒါတောင် အရေပြားရဲ့ thermal sensitivity ပေါ်မူတည်ပြီး ယေဘူယျပဲ အပူချိန်မြင့်မမြင့်ပြောနိုင်တာမို့ ပုံထဲကလို အဝေးကြီးတွေကနေတိုင်းနေရင်တော့ အချိန်ကုန် လူပန်း ပြီး တိုင်းတာနဲ့မတိုင်းတာ ဘာမှထူးမှာမဟုတ်ပါကြောင်း ။

သက်တန့်ချို
3.4.2020

Credit : မူရင်း ဓါတ်ပုံပိုင်ရှင်

ဘာလို့ Mask တပ်ခိုင်းတာလဲသိလား ?

ဘာလို့ Mask တပ်ခိုင်းတာလဲသိလား ?

Mask တပ်တာနည်းတဲ့ အီတလီ - ၁၃၁၅၅ သေဆုံး
လူတိုင်းကိုယ်စီ Mask တပ်တဲ့ ထိုင်ဝမ်မှာ - ၅ ယောက်သေဆုံးတဲ့

Mask တပ်တာနည်းတဲ့ စပိန် မှာ ၉၃၈၇ သေဆုံးပြီး
လူတိုင်းကိုယ်စီ Mask တပ်တဲ့ ဂျပန်မှာ - ၅၇ ယောက်သေဆုံးတဲ့

Mask တပ်တာနည်းတဲ့ အမေရိကမှာ ၅၁၁၀ သေဆုံးပြီး
လူတိုင်းကိုယ်စီ Mask တပ်တဲ့ တောင်ကိုရီးယားမှာ ၁၆၉ ယောက်သေဆုံးတဲ့

အရင်က WHO နဲ့ U.S Surgeon General ကပြောတယ် Mask တွေက COVID-19 ပျံ့နှံ့မှု တားဆီးရေးမှာ အသုံးမဝင်ပါဘူးတဲ့ ဒါကြောင့် ကိုယ့်မှာ ဖျားနာ‌ချောင်းဆိုး နဲ့အသက်ရှုလမ်းကြောင်းဆိုင်ရာ လက္ခဏာတွေမရှိရင် mask တွေကို လုယက်မဝယ်ကြပါနဲ့ဆိုတယ် ။
အောက်မှာ ဖတ်ကြည့်

If you do not have any respiratory symptoms, such as fever, cough, or runny nose, you do not need to wear a medical mask. When used alone, masks can give you a false feeling of protection and can even be a source of infection when not used correctly. ➡️https://t.co/0nyHux1SgN pic.twitter.com/JDQhnowx3p
— World Health Organization Western Pacific (@WHOWPRO)

တကယ်မှန်ရဲ့လား ? လေ့လာမှုတွေအရ Mask တပ်ခြင်းကြောင့် COVID-19 ကြောင့်သေဆုံးမှုကိုအောက်ပါနည်းလမ်း ၃ ချက်နဲ့လျော့ကျစေနိုင်ပါသတဲ့ ။

၁ ။ ရောဂါပိုးကူးစက်ခံနေရသူတွေကြောင့် ပိုးပျံ့နှံ့ခြင်းကို နည်းစေနိုင်ခြင်း ။ Mask က virus particles တွေကို အတွင်းမှာ ပိတ်မိအောင်လုပ်တယ် ဒီ Virus particles တွေကို airborne ဖြစ်မလာအောင်ကာကွယ်ပေးစတယ် ပြီးတော့တခြားသူတွေကိုကာကွယ်ပေးနိုင်တယ် ။

၂ ။ ရောဂါပိုးမကူးစက်ခံရသေးတဲ့သူတွေကိုလည်း new infection ရစေခြင်းကိုနည်းစေတယ် ။ အပြင်ဖက်မှာ ပျံ့နေတဲ့ airborne virus particles တွေကို ရှူသွင်းခြင်းကနေ ကာကွယ်ပေးပြီး သင့်ကို သင် ကာကွယ်ပေးနိုင်တယ် ။

၃ ။ လက်ကနေတဆင့်မျက်နှာကိုထိတွေ့ခြင်းကို ကန့်သတ်ပေးတယ် ။ Mask တပ်ခြင်းအားဖြင့် ညစ်ပေးနေတဲ့ ပိုးကပ်နေနိုင်တဲ့ လက်နဲ့ ခန္ဓာကိုယ်အဆုတ်ထဲကို မျက်နှာကိုထိတွေ့ခြင်းမှမတဆင့်မဝင်နိုင်အောင် physical barrier အနေနဲ့ တားဆီးပေးနိုင်ပါတယ် ။

Czech Republic နိုင်ငံမှာ မတ်လ ၁၈ ရက်နေ့ကတည်းက လူထု ကို Mask ဝတ်ဖို့တိုက်တွန်းပြီး အပြင်ထွက်တာနဲ့ mask တပ်စေတယ် ။ ဒီတော့ သူတို့နိုင်ငံမှာ Confirmed Case ခုထိ ၃၅၈၉ ပဲရှိပြီး သေဆုံးသူ  ၃၉ ယောက်ပဲရှိပါသေးတယ် ။ ဒိန်းမတ်လည်းအလားတူပါပဲ ။

ရောဂါကူးစက်မှုကို ကျွမ်းကျွမ်းကျင်ကျင်ထိမ်းချုပ်နေနိုင်ပြီဖြစ်တဲ့ တောင်ကိုရီးယားနဲ့ဟောင်ကောင်ကဘာပြောသလဲဆိုရင် " Face Masks တွေက ကျယ်ကျယ်ပျံ့ပျံ့သုံးမယ်ဆိုရင် SARS-CoV-2 ပျံ့နှံ့မှုကို နှေးစေတဲ့နေရာမှာ အထိရောက်ဆုံးဖြစ်ပါတယ် ဘာကြောင့်လည်းဆိုတော့ mask တွေက လက္ခဏာမပြတဲ့ ပိုးသယ်ဆောင်သူတွေကနေတဆင့် အကြောင်းပြချက်ခိုင်ခိုင်မာမာမရှိပဲ လူကောင်းတွေဆီကူးစက်ခြင်းကို တားဆီးပေးနိုင်ပါတယ် " တဲ့ ။

United States လိုနိုင်ငံမှာတောင် mask တွေပစ္စည်းပြတ်တာ အဓိကပြဿနာတစ်ခုဖြစ်နေတယ် ။ သောကြာနေ့တုန်းက survey အရတော့ မြို့ပေါင်း ၂၁၃ မြို့ရဲ့ ၉၂%ဟာ frist responders နဲ့ medical personnel တွေအတွက်လုံလောက်တဲ့ face masks supply မရှိသေးပါဘူးလို့ဆိုတယ် ။

အချုပ်အနေနဲ့ပြောရရင် မြန်မာနိုင်ငံအတွက် အစိုးရအနေနဲ့ အခုကတည်းက ဒါလေးတွေလုပ်ပေးရင်ကောင်းပါမယ်

 " Mask တပ်ကြပါဆိုတာထက် Mask မဖြစ်မနေတပ်ပါ " ဆိုတာမျိုး ဒီအတွက်လည်း mask တစ်ခုကို ၅၀၀ ကနေ ၁၀၀၀ ကြားပေးဝယ်နေရတဲ့ issue တွေမရှိအောင် စျေးမြင့်တာတွေမမြင့်အောင်စီစဉ်ပေးဖို့လိုပါမယ် ။

Social Distancing ကို အင်တိုက်အားတိုက်ခုကတည်းက ကြပ်မတ်လုပ်ဆောင်စေချင်ပါတယ် ။ ကြေငြာချက်ထုတ်တာမျိုးမဟုတ်ပဲ လိုရင်းတိုရှင်း လူတစ်ယောက်နဲ့ တစ်ယောက် ၆ ပေကွာ လျောက်ပါဆိုတာမျိုး ။

အလုပ်တွေ ပိတ်ကြပါ ဆိုတာထက် အိမ်မှာနေရင်း WORK FROM HOME လုပ်လို့ရတဲ့အလုပ်တွေကို ခွဲထုတ်ပြီး traffic လျော့ကျစေဖို့စနစ်တကျ လုပ်ဆောင်ဖို့ တိုက်တွန်းတာမျိုး ( ဥပမာ စင်ကာပူလို )

လူစုလူဝေးရှိတဲ့နေရာ မသွားပါနဲ့ဆိုတာထက် လူဘယ်ယောက်ထက်ပိုစုဝေးရင် ဒါဏ်ကြေးဘယ်လောက်ဆိုတာမျိုး ။

လိုအပ်ရင် Contact ရှိနေတဲ့ Crowded city တွေကို အချိန်အပိုင်းအခြားနဲ့အသွားအလာကန့်သတ်တာမျိုး ( Community Quarantine )  ။

နိုင်ငံတော်အခြေအနေကိုအားနာပေမယ့် ဆုံးဖြတ်စရာရှိတာတွေကိုမြန်မြန်ဆုံးဖြတ်ပြီး Super Spreader တွေ Massive Spreading တွေကို အချိန်ရှိတုန်းလေး တားကြရအောင်ပါ ။

သက်တန့်ချို
2.4.2020

လေ့လာချင်ရင်
https://www.maskssavelives.org/?fbclid=IwAR2oMkwnDvM0V-UV0bZD6awY19fWWtlI3c2g7d8ZNXdfjWZjtQvo3T1FII0
https://www.npr.org/sections/health-shots/2020/03/31/824560471/should-we-all-be-wearing-masks-in-public-health-experts-revisit-the-question
https://www.worldometers.info/coronavirus/

ကျန်းမာစေ လန်းပါစေ

ကျန်းမာစေ လန်းပါစေ

အသိကို သတိနဲ့ယှဉ်
မြင်သမျှ တွေးဆ
ဘ၀ဆိုတာ ..
ရေပွက် ပမာ တစ်ခဏမျှသာ ။

အသက်ရှုနေသမျှ ဒီဘ၀
ရသော ဉာဏ်
မှန်သော ထုံး
ပြုံးလို့သာ နေပါလေ ။

အို ..
ကျန်းမာစေ
လန်းပါစေ
ဘေးရန်ရှင်းလို့
ကပ်ဘေးလည်းကင်းပါစေ ။

သက်တန့်ချို
29.3.2020

၈ ယောက်မှသည် ရှစ်ဆယ်ရှစ်ထောင်မဖြစ်စေဖို့

၈ ယောက်မှသည် ရှစ်ဆယ်ရှစ်ထောင်မဖြစ်စေဖို့

- သတိကြီးကြီးထားပြီး အသွားအလာ ဆင်ခြင်ကြစို့ ။

- လူထူထပ်တဲ့နေရာတွေ မသွားပဲနေကြစို့ ။

- အပြင်သွားတိုင်း Mask တပ်စို့ ။

- အပြင်က ပြန်လာတိုင်း လက်ဆေးကြစို့ ။

- တစ်ယောက်နဲ့တစ်ယောက် ခပ်ခွာခွာ ၃ ပေအကွာနေကြစို့ ။

- သတင်းမှားတွေ ရှောင်ကြစို့ ။

အစိုးရက အခုထိ အသွားအလာမကန့်သတ်သေးလည်း ကိုယ့်ဘာသာ ကန့်သတ်ကြပါ ။
ဖြစ်နိုင်ရင် ဘယ်မှ မထွက်တာအကောင်းဆုံးပါပဲ။

မိမိဘာသာ ရက်အကန့်အသတ်နဲ့ lock down ချကြပါ ။

သက်တန့်ချို
28-March 2020

စုစုပေါင်း မြန်မာပြည်မှာ (၃) ယောက်တွေ့ပြီးတဲ့နောက် ဘာဆက်လုပ်ကြမလဲ ?

စုစုပေါင်း မြန်မာပြည်မှာ (၃) ယောက်တွေ့ပြီးတဲ့နောက် ဘာဆက်လုပ်ကြမလဲ ?

လိုရင်းတိုရှင်းပဲ သွားရအောင် ။

👉 COVID-19 က Severe Acute Respiratory Syndrome Coronavirus 2 ( SARS-CoV-2) လို့ခေါ်တဲ့ positive-stranded RNA viruses အမျိုးအစား ။

👉 ချောင်းဆိုး ၊ နှာချေ  တာနဲ့ respiratory droplets တွေကနေတဆင့်ဗိုင်းရပ်ပျံ့နှံ့ကူးစက်တယ် ။

👉 လက္ခဏာတွေက ဖျားမယ် ၊ ချောင်းဆိုးမယ် ၊ အသက်ရှုခက်ခဲမယ် အသက်ရှုကြပ်မယ် ။

👉 ဗိုင်းရပ်စ်ဝင်ပြီး ၂ ရက်နေ ၁၄ ရက်အတွင်း လက္ခဏာတွေ ရှိနိုင်တယ် ။

👉 လက္ခဏာပြနေတဲ့အချိန်မှာ လူလူချင်း အနေနီးရင် ကူးစက်မယ် ။

COVID-19 အတွက် CDC ရဲ့ disinfection ကတော့ ဒီလိုတွေပြောတယ် ။

ဘာတွေနဲ့ ပိုးသတ်ရမလဲဆိုရင် CDC ကတော့ dilute လုပ်ထားတဲ့ household bleach solution သို့မဟုတ် alcohol 70% ပါဝင်တဲ့ alcohol solution သုံးလို့ရတယ်ဆိုပါတယ်။ EPA registered household disinfectants တွေလည်းသုံးလို့ရပါတယ် ။

Household bleach solution ဇွန်း ၅ ဇွန်းကို ရေ ၁ ဂါလံနဲ့ရောသုံးရမှပါ ။ ဒါဟာ household နဲ့ general disinfection အတွက်ပါ ။

ညစ်ပေနေတဲ့ မျက်နှာပြင်အတွက်ဆို အရင်ဆုံး disinfection မလုပ်ခင် ဆပ်ပြာမှုန့် ဆပ်ပြာ နဲ့ရေ အသုံးပြုပြီးအရင်ဆေးကြောသန့်စင်ရမယ် ။တစ်ခါသုံးလက်အိတ်သုံးရမယ် ။

လက်အိတ်မသုံးဖြစ်ရင် disinfection လုပ်ပြီးတိုင်း လက်ကို သေချာပြန်ဆေးရမယ်။

CDC Guideline - https://www.cdc.gov/coronavirus/2019-ncov/prepare/cleaning-disinfection.html

အခု ဒီစာကို ဖတ်မိတဲ့လူတွေကို အဓိက လိုတိုရှင်းပြောချင်တာက

၁ ။ သံသယလူနာရှိရင် သတင်းပို့ပါ ။  Hotline : 067 3420268 ,  067 3420802

၂ ။ လက်ခဏခဏဆေးပါ လက်မဆေးရသေးပဲ မျက်နှာ နှာခေါင်း ပါးစပ်ကိုမထိနဲ့ ။ လက်ဆွဲမနှုတ်ဆက်ပါနဲ့ ။ ဖက်လှဲတကင်းမ‌နေပါနဲ့ ။

၃ ။ တတ်နိုင်သမျှ အိမ်ထဲမှာပဲနေပါ ။ အပြင်သွားတိုင်း mask တပ်ပါ ။ mask ဝယ်မရရင်လက်ကိုင်ပုဝါယူသွားပါ ။ ဘာအကာအကွယ်မှ မပါတာထက်စာရင်ကောင်းပါတယ် ။

၄ ။ စားပွဲ ၊ ကြမ်းပြင် ၊ အရာ၀ထ္ထုမျက်နှာပြင်တွေ ( tables, doorknobs, light switches, handles, desks, toilets, faucets, sinks ) ကို သန့်ရှင်းရေးလုပ်ပါ ။ Soap, 70%alcohol, dettol,  aseptol စတဲ့အရာအားလုံးသုံးနိုင် ။ အသေးစိတ်သိချင်ရင် ဒီမှာ ဖတ် - https://www.americanchemistry.com/Novel-Coronavirus-Fighting-Products-List.pdf

၅ ။ အသက် (၆၀)  အထက် သက်ကြီးရွယ်အို တွေ အပြင်မထွက်ပါနဲ့ ။ (UK Recommendation အရ အသက် ၆၀ အထက်ဆိုရင် ၄ လ အိမ်ပြင်မထွက်ပါနဲ့ဆိုတယ် )

၆ ။ ပစ္စည်းတွေ လုယက်မဝယ်ပါနဲ့ ။ Positive တစ်ယောက်ပါလာရင်အကုန်သေကုန်ပါမယ် ။ ဆန်စိုက်ပြီး ဆီထွက်တဲ့တိုင်းပြည်မို့ငတ်သေစရာတော့မရှိပါ ။

၇ ။ ပိတ်လို့ရတဲ့အလုပ်တွေ ရုံးတွေ ပိတ်ပေးပါ ။ Public Transportation မှာ risk လျော့ချဖို့နဲ့ crowded risk လျော့ချဖို့ Work From Home လုပ်လို့ရတဲ့အလုပ်တွေကို သီးသန့်ခွဲပြီး လူဦးရေလျော့ချဖို့လိုပါတယ် ။

၈ ။ ကိုယ်ဖျားနေရင် ချောင်းဆိုးနေရင် အိမ်ပြင်မထွက်ပါနဲ့ ။ ဆရာဝန် ဆရာမ ကျန်းမာရေးဝန်ထမ်းကိုအကြောင်းကြားပါ ။

၉ ။ ဖုန်းကို အမြဲသန့်ရှင်းရေးလုပ်ပါ ။ အပြင်ကပြန်လာတိုင်း ရေချိုး အဝတ်လဲပါ ။ သင့်အိမ်ကို ဧည့်သည်တွေမလိုအပ်ပဲလာခြင်းကိုတားမြစ်ပါ ။

၁၀ ။ လူတစ်ယောက်နဲ့တစ်ယောက် ၃ ပေအကွာမှာ နေပါ ။ ချောင်းဆိုးတဲ့လူနဲ့ဝေးဝေးနေပါ ။ အိမ်ထဲမှာ တတ်နိုင်သမျှ နေခြင်းက ကျန်းမာရေးဝန်ထမ်းတွေကို အထိရောက်ဆုံးကူညီပေးခြင်းပါပဲ ။

သက်တန့်ချို
25-Mar-2020
ကမ္ဘာ့သတင်း update တွေဖတ်ချင်ရင် ဒီ Page ကို like & follow လုပ်ထားပါ ။ https://www.facebook.com/covid19liveupdates

Standford Medicine က တင်ထားတဲ့ COVID-19 Prevention အကြောင်း

Standford Medicine က တင်ထားတဲ့ COVID-19 Prevention အကြောင်း လွယ်ကူရှင်းလင်းတဲ့ animation video ဖြစ်ပါတယ် ။

စိတ်ဝင်စားဖို့ကောင်းပြီးနားလည်လွယ်တာမို့ ကြည့်ပြီးရင်ပြန်မျှဝေပေးကြပါဦး ။

လူတွေဟာ Panic ( စိုးရိမ်ထိတ်လန့်ကြောက်ရွံ့မှုလွန်ကဲခြင်း ) ဖြစ်ပေါ်လာတဲ့အခါ Panic Buy လို့ခေါ်တဲ့ လူစုလူဝေးနဲ့ကြောက်လန့်တကြားစျေးဝယ်တာတွေဖြစ်လာကြတယ် ။ ဒီ Video လေးထဲမှာတော့ အဲ့ဒီလိုမဖြစ်အောင် ဘယ်လို ကာကွယ်ရမယ်ဆိုတာ ဖော်ပြထားပါတယ် ။

၁ ။ လူစုလူဝေးမလုပ်ရဘူး ။
၂ ။ အိမ်ထဲမှာပဲနေရမယ် ။
၃ ။ လက်ဆွဲမနှုတ်ဆက်ရဘူး ။
၄ ။ ၃ ပေအကွာနေရမယ် ။
၅ ။ မျက်နှာကို လက်နဲ့မကြာခဏမထိတွေ့ရဘူး ။
၆ ။ ဖျားနာနေရင်အလုပ်မသွားရဘူးအပြင်မထွက်ရဘူး ။
၇ ။ ဖျားနေရင်အိမ်မှာပဲနေပြီး ဆေးရုံဆေးခန်းကျန်းမာရေးဝန်ထမ်းကိုအကြောင်းကြားရပါမယ် ။
၈ ။ လက်ကိုဆပ်ပြာနဲ့ဆေးရမယ် ၊ ကြမ်းပြင်တွေကို အမြဲသန့်ရှင်းအောင်ထားရမယ် ။
၉ ။ ပစ္စည်းတွေကို လုမဝယ်ရဘူး ၊ လိုအပ်သလောက်ပဲ ဝယ်ရမယ် ။
၁၀ ။ ဒီလိုအသိတွေကို သင်နဲ့သင့်မိသားစု သင်ချစ်တဲ့သူတွေကိုမျှဝေပေးရပါမယ် ။

COVID-19 Update 1/18-March

COVID 19 Virus ဟာ မိနစ် (၃၀ ) ခန့် လေထဲမှာ ရပ်ဆိုင်းနေနိုင်တယ်လို့ လေ့လာမှုအသစ်တွေက ပြောပါတယ် ။
https://www.nytimes.com/20…/…/18/world/coronavirus-news.html
ကမ္ဘာတဝှမ်းကူးစက်ခံရမှု Confirmed Case ပေါင်း ၁၉၇၀၀၀ ရှိပါပြီ ။

ဆော်ဒီမှာလည်း Private sectors တွေကအလုပ်တွေအားလုံးရပ်ဆိုင်းကုန်တယ် ။
သီရိလင်္ကာ - မည်သည့်လေကြောင်းလိုင်းမဆို အဝင် ၂ ပတ် ပိတ်တယ် ။
အိမ်ဖြူတော်က အရေးပေါ် ရန်ပုံတွေ USD 45.8 billion ကို တောင်းဆိုထားတယ် ။
တောင်ကိုရီးယား ရဲ့ Vice Health Minister ကတော့ self quarantine လုပ်နေရတယ် ။
Walmart ကတော့ တစ်ကမ္ဘာလုံး ဗိုင်းရပ်စ်တိုက်ထုတ်ရေးကြိုးပမ်းမှုအတွက် $25 million ထောက်ပံ့မယ်လို့ ဆိုတယ် ။
https://edition.cnn.com/…/coronavirus-outbreak-0…/index.html
မြန်မာပြည်မှာ ကူးစက်ခံရသူ မရှိသေးပါ ။
#MOHS
18-2-2-20 12:27 PM

Update များ ဖတ်ချင်ရင် - https://www.facebook.com/covid19liveupdates

လူတွေနဲ့ဝေးသွားရခြင်းအကြောင်းတရားများ

လူတွေကို အမှန်အတိုင်းဆက်ဆံလိုက်တဲ့အချိန်
လူတွေကို အရှိအတိုင်း ပေါင်းသင်းလိုက်တဲ့အချိန်
လူတွေကို ရိုးသားမိလိုက်တဲ့အချိန်
လူတွေကို မကူညီနိုင်လိုက်တော့တဲ့အချိန်
လူတွေက ကိုယ့်အားနည်းချက်ကိုမြင်မိလိုက်တဲ့အချိန်
လူတွေရဲ့မျက်နှာဖုံးကို မတော်တဆ ချွတ်မိလိုက်တဲ့အချိန်
ကိုယ့်အခက်အခဲကြောင့်တစ်ဖက်လူကို မျက်နှာ ခဏလွှဲလိုက်မိတဲ့အချိန်ကစပြီး

လူတွေနဲ့  ဝေးသွားတာပါပဲ ။

သက်တန့်ချို
4-Mar 2020

လိုက်မခံစားနဲ့

လူတိုင်းကိုအရေးပေးပြီး
ကိုယ့်ကိုလစ်လျူရှုတာကို လိုက်မခံစားနဲ့

လူတိုင်းကကံကောင်းပြီး
ကိုယ်က ကံဆိုးနေတာကို လိုက်မခံစားနဲ့

လူတိုင်းကိုဖော်ရွေပြီး
ကိုယ့်ကို စိမ်းကားတာကို လိုက်မခံစားနဲ့

လူတွေရဲ့ ချစ်ခြင်း မုန်းခြင်းတွေကို လိုက်မခံစားနဲ့

လူတွေရဲ့ မလိုတမျိုး လိုတမျိုး မျက်နှာထားတွေကို လိုက်မခံစားနဲ့

လူတွေရဲ့ ကိုယ့်အပြစ်လွတ်ချင်စိတ်တွေကို လိုက်မခံစားနဲ့

လူတွေရဲ့  အပြစ်ပြောချင်စိတ်တွေကို လိုက်မခံစားနဲ့

လူတွေရဲ့ ပြောင်းလဲတတ်ခြင်းတရားကို လိုက်မခံစားနဲ့

အရာရာကို နှလုံးသားနဲ့လိုက်ခံစားမိသူဟာ ပင်ပန်းဆင်းရဲတတ်တယ်

လောကကြီးမှာ မှန်လိုကျင့်တာ စိတ်ချမ်းသာဆုံးနည်းလမ်းပါပဲ ။

သက်တန့်ချို
27-Feb 2020

ဂရုမစိုက်ပါနဲ့

အတင်းပြောလည်း ဂရုမစိုက်ပါနဲ့
ကိုယ် မရှိတဲ့အချိန် ဘယ်သူက လာကျွေးမှာ မို့လဲ

အခေါ်အပြောမလုပ်လည်းဂရုမစိုက်ပါနဲ့
ဘယ်သူကများ စိတ်ထားအမှန်နဲ့ ဆက်ဆံပေးခဲ့ဖူးလို့လဲ

လာလာ နှိမ်လည်းဂရုမစိုက်ပါနဲ့
ကိုယ်အမြင့်ရောက်အောင် ဘယ်သူက ဆွဲတင်ပေးမှာ မို့လဲ

ကိုယ့်ထမင်းကိုယ်ရှာစားရတာခြင်းအတူတူ
သူတစ်ပါးအရိပ်အခြေကြည့်ပြီး အလိုက်အထိုက်ဆက်ဆံရတာ
စိတ်ပျက်ဖို့အကောင်းဆုံးပါပဲ ။

သက်တန့်ချို
26-Feb 2020

နေဝင်ချိန်ရောက်ခဲ့ရင်

သင့်ကို စွန့်ခွာသွားလို့ ဝမ်းနည်းမနေနဲ့
သင်လည်းတစ်နေ့ အကုန်လုံးကို စွန့်ခဲ့ရမှာ ။

သင့်ကို လမ်းခွဲသွားလို့ မျက်ရည်ကျမနေနဲ့
သင်လည်းတစ်နေ့ အချစ်အမုန်း အားလုံးကို လမ်းခွဲခဲ့ရမှာ ။

သင့်ကို နာကျင်စေခဲ့လို့ မုန်းတီးမနေနဲ့
အရာရာဟာ ကံကြမ္မာအတိုင်းဖြစ်ပျက်နေကြတယ် ။

" နေဝင်ချိန်ဆိုတဲ့ တစ်နေ့ရောက်လာခဲ့ရင်
အရာရာကို ထားခဲ့ရမယ် "

သက်တန့်ချို
25-Feb 2020

Coronaviruses Update 11.2.2020

11.2.2020 သတင်းတွေအရ
တစ်ကမ္ဘာလုံးမှာ Coronaviruses Confimed Case : 43105
စုစုပေါင်းသေဆုံးမှုဦးရေ : 1018
တရုတ်ပြည်တစ်ခုထဲ Confirmed case : 42638
ကုသပျောက်ကင်းသူဦးရေနှင့်ဆေးရုံဆင်းသူဦးရေ : 3396
တရုတ်ပြည်တစ်ခုထဲသေဆုံးသူဦးရေ : 1016

ဂျပန်မှာ Diamond Princess လို့ခေါ်တဲ့ သင်္ဘောပေါ်မှာ လူပေါင်းထောင်ချီပြီး ဖယ်ထုတ်စောင့်ကြည့်နေတယ် အဲ့ဒီအထဲမှာ ၁၃၅ ယောက်က ကူးစက်ခံစထားရပါတယ် အမေရိကန်လူမျိုး ၂၄ ယောက်လည်းပါပါတယ် ။

ဂျပန်မှာ Negative အဖြေထွက်ထားတဲ့လူ ၂ယောက်မှာ အခု ပိုးကူးစက်တဲ့ positive အဖြေပြန်ထွက်လာတယ်လို့ CNN မှာ ဖော်ပြထားပါတယ် ။
ဂျပန်တစ်နိုင်ငံထဲတောင် ကူးစက်ခံရသူဦးရေ ၁၆၃ ယောက်ရှိပြီဖြစ်တယ် ။

ဗီယက်နမ်မှာ ၃ လအရွယ်ကလေးငယ်တစ်ဦးအပါအဝင် နောက်ထပ် လူ ၂ ယောက် ကူးစက်ခံရတယ်လို့အတည်ပြုထားပါတယ် ။
စုစုပေါင်း ၁၅ ယောက်ရှိပြီဖြစ်ပါတယ် ။

စင်ကာပူမှာ ၂ နှစ်အရွယ် မိန်းကလေးတစ်ဦးကို ဗိုင်းရပ်ကူးစက်ခံရကြောင်း အတည်ပြုမှု လွန်ခဲ့တဲ့ ၃ နာရီလောက်က ထွက်ပေါ်ခဲ့ပါတယ် ။ တရုတ်ပြည်ကို ခရီးသွားခဲ့ဖူးခြင်းမရှိသူပါတဲ့ ။ စင်ကာပူမှာ ကူးစက်ခံရသူပေါင်း ၄၅ ယောက်ရှိပြီဖြစ်ပါတယ် ။

Source : https://edition.cnn.com/asia/live-news/coronavirus-outbreak-02-11-20-intl-hnk/index.html

မြန်မာနိုင်ငံ လက်ရှိအခြေအနေ

10 ရက်နေ့က တင်ထားတာပါ
Total PUI/Suspected - 28
Person Under Investigation (PUI) - 26
Suspected - 2
Confirmed - 0
Laboratory Result Negative - 7
Laboratory Result Pending - 20
Discharged from Hospital - 7

Source : https://mohs.gov.mm/Main/content/publication/2019-ncov

Wuhan Coronaviruses Latest Update (4.2.2020)

- Confirmed cases ပေါင်း ၂၀၆၂၀
- သေဆုံး ၄၂၆
- Vaccine မရှိသေး ထိုင်းမှာတော့ ကိုရိုနာဗိုင်းရပ်စ်လူနာ ၂ ယောက်ကို ဗိုင်းရပ်စ်ပေါင်းစပ်ကုသဆေးတစ်မျိုးနဲ့အောင်မြင်အောင်ကုသနိုင်လိုက်တယ်လို့ဆိုတယ်

တစ်နေ့တစ်နေ့ တိုးပွားလာနေတဲ့ Confirmed cases အရေအတွက်နဲ့သေဆုံးသူဦးရေကိုကြည့်ခြင်းအားဖြင့် ကိုရိုနာဗိုင်းရပ်စ်ဟာ တရုတ်ပြည်အတွက်အကြီးမားဆုံးစိန်ခေါ်မှုဖြစ်လာယုံသာမက
တစ်ကမ္ဘာလုံးကပါ အနီရောင်အဆင့် alarm ပေးထားရတဲ့ အခြေအနေဖြစ်လာပါတယ် ။

Live Update : https://edition.cnn.com/asia/live-news/coronavirus-outbreak-02-04-20/index.html

Coronaviruses Update ( Feb 2)

နောက်ဆုံးဖတ်ရတဲ့ February ၃ ရက်နေ့ သတင်းတွေမှာတော့ ၂၀၀၃ ခုနှစ်တုန်းက SARS outbreak ထက် တရုတ်ပြည်မှာ လူသေဆုံးမှု မြင့်တက် နေပါတယ် ။ China's National Health Commission ရဲ့အဆိုအရ တနင်္ဂနွေနေ့အထိ ကိုရိုနာဗိုင်းရပ်စ်ကြောင့် သေဆုံးမှု ၃၆၁ ဦးရှိပြီး SARS တုန်းကတော့ ၃၄၉ ယောက်ရှိတယ်ဆိုပြီး နှိုင်းယှဉ်ပြထားပါတယ် ။ 

SARS တုန်းကတော့ ကမ္ဘာတဝှမ်းမှာ လူပေါင်း ၇၇၄ ယောက်သေဆုံးခဲ့ပြီး ယနေ့အချိန်အချိန်တော့ ၀ူဟန်ကိုရိုနာဗိုင်းရပ်စ်ကြောင့် တရုတ်ပြည်အပြင်ဖက်မှာတော့ သေဆုံးသူ (၁) ဦးရှိခဲ့ပါတယ် ။ 

United State မှာတော့ လူပေါင်း ၁၁ ယောက် Confirm ဖြစ်သွားပါပြီ 

Arizona: 1 case

California: 6 cases

Illinois: 2 cases

Massachusetts: 1 case

Washington: 1 case

အခုလက်ရှိအချိန်ထိ စုစုပေါင်းကူးစက်ခံရမှု ဟာ 17384 ရှိပြီဖြစ်ပြီး မြန်မာနဲ့အနီးဆုံး ထိုင်းနိုင်ငံမှာ ၁၉ ယောက်ကူးစက်ခံရပြီးဖြစ်ပါတယ် ။ 

တရုတ်ပြည်မှာတော့ ကိုရိုနာဗိုင်းရပ်စ်ကြောင့် လူမျိုးရေးဝါဒတွေ ၊ ခွဲခြားဆက်ဆံခံရမှုတွေနဲ့ သူစိမ်းကြောက်လန့်ခြင်းဆိုတဲ့ Xenophobia ဖြစ်စဉ်တွေဟာ အရှိန်အဟုန်နဲ့ ဖြစ်ပွားနေပါတယ်

Source : CNN

Wuhan Coronaviruses Update 1/31

တရုတ်ပြည်မှာ Confirmed cases ဟာ တစ်ရက်တည်းမှာ ၂၀၀၀ ထိခုန်တက်သွားတယ် ဒါကြောင့် တရုတ်ပြည်ရဲ့ စုစုပေါင်း ကူးစက်ခံရမှုဦးရေဟာ ၉၆၀၀ ရှိသွားပြီဖြစ်ကြောင်း CNN မှာ ဖော်ပြထားပါတယ်

မနေ့က ဇန်နဝါရီ ၃၀ မှာ Wuhan ကော်ရိုနာဗိုင်းရပ်စ် ကူးစက်ခံရမှု အတည်ပြုခံရသူဦးရေမှာ ၉၆၉၂ ယောက်ရှိတယ်လို့ China's National Health Commission က ကြေငြာခဲ့ပါတယ် ။

တရုတ်ပြည်မှာ အခုဆိုရင် လူပေါင်း ၂၁၃ ဦး သေဆုံးပြီးဖြစ်ပြီး new deaths ၄၂ ဦးကိုတော့ Hubei province မှာ ဖြစ်ပွားခဲ့တာတွေ့ရပါတယ် ။ ရောဂါဖြစ်ပွားပြီး Total recovered ရသူကတော့ ၁၄၃ ယောက်ပဲရှိပါသေးတယ် ။

အကြံပေးချင်တာကတော့ မြန်မာနိုင်ငံမှာ Confirmed case မတွေ့သေးဘူးဆိုတာထက် ‌Confirmed ဖြစ်နေရင်တောင် ထိုင်းကိုပို့ပြီးစစ်ရမှာလို့သိထားရတဲ့အတွက် ကိုယ့်ကိုယ်ကိုယ်ကာကွယ်ပြီးနေတာအကောင်းဆုံးပါပဲ ။

မှာ ချင်တာ အဓိက (၃) ချက်ပဲရှိပါတယ် ။

၁ ။ လူထူထပ်တဲ့နေရာတွေကိုတပ်နိုင်သမျှရှောင်ပါ ။ အပြင်သွားမယ်ဆို နှာခေါင်းစည်းတပ်ထားပါ ။
၂ ။ ဖျားနာ ချောင်းဆိုးတဲ့လူတွေနား တတ်နိုင်သမျှ မကပ်ပါနဲ့ ဝေးဝေးနေပါ ။
၃ ။ အပြင်ကပြန်လာပြီးတိုင်းဖြစ်စေ ၊ အရာ၀ထ္ထုတွေကိုင်တွယ်ထားပြီးတိုင်းဖြစ်စေ လက်ဆေးပါ ။

Real Time Update Map Link

Wuhan Coronaviruses ဖြစ်ပွားနေတဲ့ဒေသတွေ ၊ ဘယ်နှစ်ယောက်ဖြစ်နေလဲဆိုတဲ့ Confirmed case နဲ့သေဆုံးသူဦးရေတွေကို Real time live အနေနဲ့ https://gisanddata.maps.arcgis.com/apps/opsdashboard/index.html#/bda7594740fd40299423467b48e9ecf6 မှာ ကြည့်လို့ရပါတယ် ။

၀ူဟန်မြို့၏ ခြောက်ကပ်တိတ်ဆိတ်နေသော မြင်ကွင်းများ